Jennifer Lopez ka filluar xhirimet për filmin e saj të ri, “The Last Mrs. Parrish”, një thriller psikologjik që mbështetet në romanin bestseller të Liv Constantine. Ky projekt shënon një hap të ri në karrierën e saj, pas promovimit të filmit “Kiss of The Spider Woman” dhe zhvillohet pa pjesëmarrjen e ish-bashkëshortit Ben Affleck.
Filmi, i prodhuar nga Amazon MGM Studios, do të shohë Lopez në rolin e Amber Patterson, një grua ambicioze dhe manipuluese që synon të marrë jetën luksoze të Daphne Parrish. Megjithatë, ajo shpejt do të kuptojë se në botën e pasurisë dhe mashtrimeve, asgjë nuk është si duket. Krahas Lopezit, në kastin e filmit përfshihen edhe Isabel May dhe Nikolaj Coster-Waldau, i njohur nga “Game of Thrones”. Historia premton tension, intriga dhe kthesa dramatike, duke e vendosur Lopezin në një nga rolet më të errëta të karrierës së saj.
Në një intervistë të fundit, 56-vjeçarja ka folur për përgatitjet intensive për rolin e saj. Ajo ka humbur rreth 4.5 kilogramë përmes një regjimi të rreptë ushqimor dhe stërvitjeje, për të arritur një peshë të shëndetshme dhe ideale, sipas nutricionistes Monica Partier.
Përtej angazhimeve në ekran, Lopez ka reflektuar edhe mbi jetën e saj personale, duke theksuar se po kalon një periudhë vetë-rikuperimi emocional. Ajo ka shprehur dëshirën për të përqafuar lumturinë dhe përmbushjen personale përtej marrëdhënieve të së shkuarës.
Ky projekt pritet të jetë një nga më të diskutuarit në Hollivud për vitin 2026, duke e rikthyer Jennifer Lopezin në qendër të vëmendjes, jo vetëm si një ikonë e muzikës, por edhe si një aktore që sfidon veten me role të thella dhe të papritura.
