Tre persona nga Shkodra janë arrestuar për mashtrim me vlera të mëdha në kuadër të operacionit të koduar “Signal”. Të arrestuarit janë; Jasmin Pepaj 40 vjeç, Rezart Pepaj 31 vjeç dhe Sherif Kadroviç 36 vjeç, të tre banues në Shkodër.
Këta persona prezantoheshin në biznese të ndryshme në Tiranë si njerëz të rëndësishëm në strukturat e shtetit, për të përfituar shuma të konsiderueshme parash në euro. Operacioni pas ndjekjes disa ditore u finalizua sot dhe tre mashtruesit u kapën duke marrë shumën prej 130 000 eurosh.
Gjatë kontrolleve të ushtruara në banesat e tyre u gjetën dhe u sekuestruan edhe 12 600 euro të tjera, të përfituara nga veprimtaria kriminale e mashtrimit. Në total, në kuadër të këtij operacioni, u sekuestruan në cilësinë e provës materiale, 142 600 euro.
Në lidhje me këtë rast, nga Drejtoria Hetimore në Policinë e Shtetit, në bashkëpunim me Prokurorinë pranë Gjykatës së Rrethit Gjyqësor Tiranë, është ngritur një grup i posaçëm hetimor, për thellimin e hetimeve, me qëllim identifikimin dhe kapjen e shtetasve të tjerë të implikuar në këtë veprimtari kriminale.
