SHBA- Artistja e famshme botërore, Madonna i ka kërkuar Papa Leos të vizitojë Gazën në një mision humanitar për të ndihmuar fëmijët palestinezë që po vdesin nga uria, duke theksuar se “nuk ka më kohë”.
Superylli amerikan, e cila u rrit si katolike romake, iu lut papës së ri që të vizitonte enklavën në një postim në Instagram të hënën ku shprehej: “Atë i Shenjtë. Të lutem shko në Gaza dhe sill dritën tënde tek fëmijët para se të jetë tepër vonë. Si nënë, nuk mund ta duroj dot vuajtjen e tyre. Fëmijët e botës u përkasin të gjithëve. Ti je i vetmi prej nesh që nuk mund të të mohohet hyrja.”
Madonna tha se po i bënte thirrje Papës të vizitonte Gazën sepse politika nuk mund të ndikojë në ndryshim, por ndërgjegjja mundet. Në postimin e publikuar në ditëlindjen e djalit të saj, Rocco, Madonna tha se dhurata më e mirë që mund t’i bënte është “t’u kërkojë të gjithëve të bëjnë çmos për të ndihmuar në shpëtimin e fëmijëve të pafajshëm të zënë në mes të zjarrit në Gaza”.
Që kur filloi mandatin e tij si papat në maj, Papa ka qenë i ashpër në kritikat e tij ndaj luftës së Izraelit në Gaza, duke shprehur vazhdimisht shqetësimin e tij për civilët palestinezë që përballen me bombardimet izraelite.
“Po e ndjek me shqetësim të madh situatën e rëndë humanitare në Gaza, ku popullsia civile po vuan nga uria e rëndë dhe mbetet e ekspozuar ndaj dhunës dhe vdekjes”, tha ai në korrik, duke bërë thirrje për një armëpushim.
Sipas UNICEF-it, agjencisë së Kombeve të Bashkuara për fëmijët, më shumë se 18,000 fëmijë janë vrarë në Gaza që nga fillimi i luftës në tetor 2023. Një mesatare prej 28 fëmijësh janë vrarë atje çdo ditë, tha agjencia javën e kaluar. Një bllokadë izraelite ndaj ndihmës për enklavën ka rezultuar në atë që Organizata Botërore e Shëndetësisë (OBSH) e ka quajtur “uri masive e shkaktuar nga njeriu”.
Drejtori i përgjithshëm i OBSH-së, Tedros Adhanom Ghebreyesus, iu përgjigj postimit të Madonnës të hënën, duke e falënderuar atë për “dhembshurinë, solidaritetin dhe angazhimin e saj për t’u kujdesur për të gjithë të përfshirët në krizën e Gazës, veçanërisht për fëmijët”.
Të paktën 222 persona – përfshirë 101 fëmijë – kanë vdekur nga kequshqyerja që nga fillimi i luftës, sipas Ministrisë Palestineze të Shëndetësisë. Izraeli kontrollon me rreptësi rrjedhën e ndihmës dhe personelit në enklavë. Në një rast të rrallë në korrik, Izraeli lejoi dy udhëheqës të kishave të vizitonin pasi Izraeli goditi kishën e vetme katolike të Gazës, duke vrarë tre persona dhe duke plagosur disa të tjerë.
Kisha kishte shërbyer si strehë për komunitetin e vogël të krishterë të Gazës gjatë gati dy viteve të luftës. Që atëherë, kriza e urisë në Gaza është thelluar, me imazhet e fëmijëve të dobësuar që kanë shkaktuar alarm global.
Nuk është e sigurt nëse qeveria e kryeministrit izraelit Benjamin Netanyahu do t’i japë Papës hyrjen në enklavë, por apeli i Madonnës nënvizon dënimin në rritje të luftës 22-mujore, e cila ka shkaktuar tensione midis Izraelit dhe aleatëve të tij.
Australia, Kanadaja dhe Franca kanë njoftuar planet për të njohur një shtet palestinez, me Mbretërinë e Bashkuar që tha me kusht muajin e kaluar se do ta njohë një shtet palestinez në shtator nëse Izraeli nuk i plotëson kriteret që përfshijnë rënien dakord për një armëpushim në Gaza.
Komentet e Madonnës vijnë në një kohë kur një numër gjithnjë e në rritje artistësh, përfshirë Massive Attack, Brian Eno dhe së fundmi U2 , kanë theksuar situatën humanitare në Gaza. Gjatë një performance në fund të vitit 2023, Madonna kritikoi gjithashtu sulmet e udhëhequra nga Hamasi më 7 tetor ndaj Izraelit dhe përgjigjen ushtarake të Izraelit. Ajo e quajti luftën “zemërthyese”.
