Ish-kryetari i Partisë Demokratike, Lulzim Basha prej rreth një jave ka dalë në terren, duke organizuar takime me ata që grupimi i tij ku përfshihet edhe deputeti Enkelejd Alibeaj i cilësojnë struktura të PD.
Pavarësisht entuziazmit të Bashës për t’i prishur punë Berishës, duket se kryetari i dorëhequr pas disa humbjeve radhazi në zgjedhje është kontestuar edhe nga ai rreth i ngushtë mbështetësish që ende ruan në bazën e PD-së.
Në një mbledhje me anëtarë të PD në qarqet e Jugut të vendit, që Basha e ka organizuar në Berat, ish-kryedemokrati është përballur me “shpërthimet” e atyre që deri pak kohë më parë dilnin në media si mbështetës dhe miq të afërt të tij.
Kështu, siç raporton Ora News, ish-kryebashkiaku i Mallakastrës Agron Kapllanaj ia ka përplasur në fytyrë Bashës faktin që e çoi PD drejt dështimeve me pasoja të rënda.
Kapllanaj gjithashtu i ka kërkuar Bashës që të mos rikthehet në krye të PD-së, pasi njeh vetëm disfata, ndërsa ka kërkuar sqarime edhe për arsyen pse ish-kryetari merr pjesë në këto takime me demokratët kur vetë është tërhequr.
“A e kuptoni se jeni një kryetar partie i dështuar në të gjithë betejat politike për 9 vjet?! Përse merrni pjesë në këto takime dhe i jepni kosto demokratëve kur vetë jeni tërhequr? Nëse keni plan për tu rikthyer atëherë ne nuk jemi me ju”, ka thënë Kapllanaj.
Mësohet se dhe Roland Bejko, një mbështetës tjetër i Bashës në daljet e tij në media ka pasur rezerva ndaj ish-kryedemokratit. Bejko është shprehur se nuk e pranon sjelljen e Bashës ndaj tyre.
