Muaji gusht parashikohet të jetë më i qëndrueshëm krahasuar me korrikun, sipas meteorologes Tanja Porja. Ajo theksoi se do të ketë dy valë të nxehti dhe rrebeshe, por temperatura ekstreme që u përjetuan në korrik nuk do të përsëriten. Nisi i gushtit do të sjellë mot të freskët me net dhe mëngjes të këndshëm, me temperature që pritet të arrijnë deri në 35 gradë Celsius.
“Moti në ditët e para do të jetë i qëndrueshëm, me temperatura që do të rriten me 2 gradë, duke u ngjitur në 35 gradë deri në datat 4-5”, u shpreh Porja. Ajo paralajmëroi se më 5 gusht do të ketë rrebeshe intensive në juglindje dhe gjysmën lindore të vendit, ndërsa gjysma e parë e muajit do të jetë pa reshje dhe mjaft komode.
Nga datas 6 gusht, temperaturat do të fillojnë të rriten me dy valë të nxehti që mund të shkojnë deri në 39-40 gradë Celsius, ndonëse kalimi mbi 40 gradë është i pakët. Lajmi i mirë është se këto valë nxehtësie do të jenë më të buta se ato të korrikut, me një periudhë nxehtësie të parashikuar nga 6 deri në 10 gusht dhe valën e dytë nga 12 deri më 17 gusht.
Në përgjithësi, muaji gusht do të ishte më i qetë dhe më i butë se korriku, ndonëse gjysma e dytë e tij mund të sjellë pak më shumë paqëndrueshmëri, por pa ekstremitete për rajonin e Ballkanit.
