Izraeli ka njoftuar se do të shkatërrojë të gjitha tunelet e mbetura nëntokësore që përdoren nga luftëtarët e Hamasit në Rripin e Gazës, pavarësisht armëpushimit të arritur me këtë grup terrorist, sipas ministrit të Mbrojtjes, Israel Katz. Ai theksoi se sfida kryesore për Izraelin pas kthimit të pengjeve do të jetë eliminimi i tuneleve të Hamasit.
Katz sqaroi se operacioni do të realizohet nga ushtria izraelite dhe do të mbikëqyret nga një mekanizëm ndërkombëtar, të cilin do ta drejtojnë Shtetet e Bashkuara. Ai gjithashtu kërkoi nga forcat ushtarake të përgatiten për këtë mision, me qëllim çmilitarizimin e Gazës dhe çarmatosjen e Hamasit.
Pas një tërheqjeje fillestare, forcat izraelite ende kontrollojnë më shumë se gjysmën e Rripit të Gazës. Tërheqja e mëtejshme do të varet nga gatishmëria e Hamasit për të dorëzuar armët. Gjatë luftës dyvjeçare, ushtria izraelite ka deklaruar se ka shkatërruar shumë tunele, por shkalla e rrjetit të mbetur mbetet e paqartë. Zyrtarët para ofensivës tha se tunelet zgatedheshin për disa qindra kilometra, përfshirë nën zona urbane.
Armëpushimi në Gazë filloi më 10 tetor, pas një marrëveshjeje të arritur midis Izraelit dhe Hamasit, njoftuar nga presidenti i Shteteve të Bashkuara, Donald Trump. Lufta filloi më 7 tetor 2023, kur militantët e Hamasit sulmuan jugun e Izraelit, duke shkaktuar vrasjen e rreth 1.200 njerëzve, shumica civilë, dhe rrëmbimin e 251 të tjerëve. Përgjigja e Izraelit ka sjellë mbi 67.000 vdekje palestinezësh, sipas Ministrisë së Shëndetësisë në Gazë. Kjo ofensivë ka detyruar shumicën e 2 milionë banorëve të Gazës të largohet dhe ka shkaktuar shkatërrime masive dhe uri të madhe.
