Italia humbi mundësinë për të marrë pjesë në Botërorin 2026 pas një humbjeje ndaj Bosnjës në finalen e playoffit, duke shënuar kështu herën e tretë radhazi që nuk arrin të kualifikohet. Megjithatë, një tërheqje e mundshme e Iranit nga turneu mund të ndryshojë situatën dhe të hapë mundësinë për ripranimin e Italisë.
Në rast të tërheqjes së Iranit, FIFA do të vendosë për zëvendësimin e tij. Sipas nenit 6 pika 7 të rregullores, federata ka të drejtë të zgjedhë një kombëtare zëvendësuese. Italia, e renditur e 12-ta në listën e FIFA-s, ka shanse për t’u ripranuar, por nuk është e garantuar që vendimi do të bazohet në renditje. Një komision i posaçëm do të shqyrtojë mundësitë.
Nëse Iranin e zëvendëson një kombëtare aziatike, Emiratet e Bashkuara Arabe, të cilat u eliminuan nga Iraku, mund të jenë një opsion. Këshilli i FIFA-s, i përbërë nga 37 anëtarë, do të marrë vendimin përfundimtar.
Një hipotezë tjetër, e përmendur nga media amerikane ‘The Athletic’, sugjeron mundësinë e organizimit të një superplayoffi kontinental në rast të bojkotit të Iranit. Ky miniturne do të përfshinte skuadrat që humbën në playoff dhe mund të zhvillohej në SHBA para fillimit të Botërorit.
Vendimi përfundimtar për tërheqjen e Iranit dhe zgjedhjen e mundshme të FIFA-s pritet të merret deri më 13 maj. Sipas rregullave, çdo kombëtare që tërhiqet nga Botërori në më pak se 30 ditë para ndeshjes së saj të parë do të gjobitet me të paktën 500 mijë franga zvicerane. Megjithatë, për arsye organizative, është e mundur që vendimet të merren edhe më herët.
