Festimet e Krishtlindjeve për një familje në Itali përfunduan në tragjedi, kur nënë e bijë humbën jetën pas një darke familjare. Antonella di Ielsi, 50 vjeç, dhe vajza e saj, Sara di Vita, 15 vjeç, ndërruan jetë brenda pak orësh në spitalin Cardarelli në jug të Italisë. Shkaku i dyshuar i vdekjes është helmimi nga ushqimi, pas një darke që ata konsumuan më 23 dhjetor, e cila përfshinte kërpudha, peshk dhe ushqime deti, si midhje, tradita të zakonshme për festat e Krishtlindjeve në rajon.
Pas darkës, nënë dhe vajza shfaqën simptoma të ngjashme, përfshirë të përzira dhe dhimbje të forta barku, duke u dërguar në spital. Sara vdiq e para, në orën 22:30 të të shtunës, pasuar nga Antonella disa orë më vonë, të dielën në mëngjes. Gjendja shëndetësore e babait dhe bashkëshortit, Gianni, gjithashtu u keqësua, duke u hospitalizuar dhe tani është në njësinë e kujdesit intensiv në spitalin Spallanzani në Romë. Antonella dhe Sara kishin qenë në spital edhe dy herë të tjera përpara ngjarjes fatkeqe, më 25 dhe 26 dhjetor, por kishin shkuar sërish me simptoma më të rënda.
E vetmja që ka mbijetuar nga ngjarja është vajza e dytë e familjes, 18 vjeçare, e cila besohet se nuk kishte ngrënë gjatë darkës fatale. Policisë i janë marrë mostra ushqimore nga shtëpia e familjes, duke përfshirë produkte të konservuara dhe të freskëta, për t’u përcaktuar se cili produkt mund të ketë shkaktuar helmimin.
Ky incident tronditës ka shokuar komunitetin vendas dhe autoritetet po punojnë për të zbardhur rastin dhe për të përcaktuar përgjegjësinë për këtë tragjedi që ndodhi gjatë një feste tradicionalisht gëzimi dhe bashkimi.
