Një autobus që përdoret për ture turistike ka rënë në lumin “Po” pranë Piazza Vittorio Veneto në qytetin e Torinos në Itali pasditen e së martës duke u fundosur pjesërisht. Ai përplasi tre gra që ishin kalimtare në trotuar dhe theu barrierën prej guri përgjatë Corso Cairoli, për të përfunduar i zhytur në ujë.
Nga dëshmitë e mbledhura rezulton se autobusi po udhëtonte në krahun e kundërt të rrugës.
Drejtuesi i mjetit u gjet i gjallë nga zjarrfikësit me një motobarkë, por në fund mjekët nuk mundën ta mbanin në jetë. Ai ishte i vetmi person në bord në momentin kur mjeti përfundoi në lumë.
Zjarrfikësit thyen xhamat për të parë nëse kishte brenda autobusit njerëz të tjerë, por fatmirësisht nuk gjetën njeri.
Ndërkohë, tre këmbësoret e aksidentuara janë transportuar me autoambulancë në spitalin më të afërt dhe ndodhen jashtë rrezikut për jetën.
Autobusi që përfundoi në lumë ishte në pronësi të kompanisë “Di Carlo Tours e Guglionesi”, nga provinca e Campobasso.
Hetuesit dyshojnë se shoferi mund të ketë pasur një sëmundje të papritur gjatë vozitjes. Në vendngjarje kanë ndërhyrë disa ekipe zjarrfikësësh dhe zhytësish, si dhe mjekë ndihmës, policia lokale, e cila është përgjegjëse për hetimin e incidentit, dhe karabinierët. Zona po ashtu u patrullua për një kohë të gjatë nga helikopteri Drago i departamentit të fluturimit të komandës provinciale të zjarrfikësve.
