Deputeti i Partisë së Lirisë, Tedi Blushi, denoncoi në një konferencë për mediat shkelje serioze të të drejtave të ish-presidentit Ilir Meta, i cili ndodhet në paraburgim që nga 21 tetori 2024 me urdhër të SPAK. Blushi, gjatë fjalës së tij, theksoi se rekomandimet e Avokatit të Popullit për rastin e Metës nuk janë zbatuar deri tani.
Ai shprehu shqetësim për mungesën e përgjigjeve nga ana e Ministrit të Drejtësisë dhe Drejtorit të Përgjithshëm të Burgjeve, pavarësisht se i kishte drejtuar kërkesat e tij atyre. “S’është marrë asnjë masë. Asnjë rekomandim i Avokatit të Popullit nuk është zbatuar,” u shpreh Blushi.
Një tjetër çështje e ngritur ishte vështirësia në komunikimin me Metën. Blushi informoi se SPAK ka ndaluar takimet e deputetëve dhe eurodeputetëve me të, një veprim që, sipas tij, shkel të drejtat e garantuara nga ligji dhe konventat ndërkombëtare. “Më nuk kontaktoj dot me zotin Meta. Edhe takimet me deputetët e tjerë janë të pamundura,” theksoi ai. Ai përmendi gjithashtu se edhe procesi i ajrosjes për Metën është i kufizuar, ndërsa të gjithë të paraburgosurit e tjerë përfitojnë nga ky shërbim çdo ditë.
Meta vazhdon të mbahet në kushte të rënda izolimi, dhe mbrojtësit e tij po kërkojnë që të respektohen të drejtat e tij në përputhje me ligjin dhe standartet ndërkombëtare. Situata e tij ka shkaktuar shqetësime në rrethana të tilla, duke nxjerrë në pah nevojën për një monitorim më të madh të respektimit të të drejtave njerëzore në sistemin e drejtësisë.
Blushi, si zëdhënës i kësaj çështjeje, apeloi për veprime urgjente dhe përkatëse nga institucionet përgjegjëse për të siguruar se të drejtat e ish-presidentit Meta dhe të tjerëve që ndodhen në ngjashëm status, respektohen siç e parashikon ligji.
