Olgarku rus Yevgeny Prigozhin, i cili është kreu i grupit të mercenarëve Wagner, ka mbrojtur vrasjen e një ish mercenari që dezertoi duke tentuar t’i bashkohet ushtrisë ukrainase.
Video e vrasjes mizore të 55-vjeçarit Yevgeny Nuzhin u publikua në kanalet ruse në Telegram. Ai dallohej teksa qëndronte në një bodrum, me sytë e mbuluar, ndërsa një ushtar tjetër e qëllon me vare në kokë. Më pas 55-vjeçari rrihet për vdekje.
Por miku i Putin e ka mbrojtur vrasjen makabre duke thënë se “ai tradhëtoi shokët ndaj dhe meritonte të vdiste si qen”.
“Ishte video e bukur, përgëzime për kameramanin, ishte e shkurtër dhe mund ta shihje shpejt e shpejt”, u shpreh Prigozhin.
55-vjeçari Nuzhin ishte dënuar me 24 vite burg për vrasje në vitin 1999. Ai tha gjatë një video të publikuar në shtator se kishte pranuar të luftonte për Wagner me qëllim që të arratisej drejt Ukrainës.
Familjarët e tij u tmerruan kur panë vrasjen në Telegram. Ndërsa djali i tij nuk pranoi të fliste për një organizatë të të drejtave të njeriut, pasi u shpreh se trembet për jetët e anëtarëve të tjerë të familjes.
