Ish-kryetari i Bashkisë së Bogotës dhe kandidati për President të Kolumbisë, Enrique Penalosa, ka shprehur shpresën për një gjyq të drejtë për kryebashkiakun e Tiranës, Erion Veliaj, i cili është mbajtur në paraburgim për mbi një vit. Penalosa, në një postim në rrjete sociale, thekson se kjo situatë nuk është shenjë e mirë për procesin gjyqësor që ka filluar.
Ai e përshkruan Veliaj si një figurë të rëndësishme që ka bërë punë të jashtëzakonshme për Tiranën dhe si një zë të njohur ndërkombëtar në fushën urbane. Penalosa shprehet: “Shpresoj që gjyqi ndaj kryetarit të Bashkisë së Tiranës, Erion Veliaj, të jetë i drejtë. Mbajtja e tij në paraburgim, për më shumë se një vit, nuk është shenjë e mirë për gjyqin, që më në fund ka filluar. Çdo gjë që di është se, për afro 10 vite, ai bëri punë të jashtëzakonshme në qytetin e tij dhe ishte një lider i rëndësishëm ndërkombëtar në fushën urbane. Ky proces do të ndiqet nga shumë sy të komunitetit ndërkombëtar, me shpresën që drejtësia do të triumfojë.”
