SPAK ka dërguar për gjykim tre individë për ushtrimin e ndikimit të paligjshëm në procedurën e transferimit të një të dënuari. Prokuroria e Posaçme kundër Korrupsionit dhe Krimit të Organizuar ka përfunduar hetimet në lidhje me procedimin penal nr. 196 të vitit 2025 dhe ka kërkuar gjykimin e të pandehurve: Zef Mali, Kreshnik Domi dhe Jemine Çoku.
Zef Mali dhe Kreshnik Domi akuzohen për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike” në bashkëpunim, ndërsa Jemine Çoku akuzohet për po të njëjtën veprë, por në një formë tjetër. Hetimet filluan pas referimeve nga Agjencia e Mbikëqyrjes Policore në Tiranë.
Duke përdorur metoda speciale hetimore, prokuroria ka dokumentuar se Zef Mali dhe Kreshnik Domi i kërkuan Jemine Çoku një shumë prej 20,000 eurosh për të ushtuar ndikim të paligjshëm mbi funksionarë të Ministrisë së Drejtësisë. Në atë kohë, Zef Mali ishte oficer në Gardën e Republikës dhe Kreshnik Domi kishte një lidhje shoqërore me të.
Sipas hetimeve, Mali dhe Domi i premtuan Çokut se do të ndihmonin në transferimin e vëllait të saj, Kujtim Çeliku, i dënuar për krime në Turqi. Nga janari deri në tetorin e vitit 2025, ata mbajtën kontakte të vazhdueshme me Jemine Çoku dhe familjarë të tjerë, duke i siguruar se kishin mundësi të ndikonin për përshpejtimin e procedurës së transferimit.
Me këtë qëllim, Jemine Çoku iu dha të pandehurve shumën prej 20,000 eurosh, e cila përbënte përfitim të parregullt. Gjatë hetimit, gjithashtu u evidentua se Ministria e Drejtësisë kishte nisur procedurat për transferimin e Kujtim Çelikut për të kryer pjesën e mbetur të dënimit në Shqipëri.
Sipas ligjit, çdo individ prezumohet i pafajshëm deri sa fajësia e tij të vërtetohet me një vendim gjyqësor të formës së prerë.
