Lajmi i tmerrshëm, në të cilin futbolli kryqëzohet me krimin vjen nga Zvicra, ku u zbulua vrasja e rëndë e kryer nga një ish-futbollist. Është gazeta “Tribune de Genève” ajo që tregon historinë, duke mos lënë mënjanë detajet më të tmerrshme. Identiteti i autorit të krimit mbahet sekret, por disa elementë ndihmojnë për të identifikuar se kush është.
Faktet datojnë në 16 qershor 2018, gati pesë vite më parë. Ish-futbollisti i përfshirë në trafikun e drogës duhej të merrte një dërgesë droge në Spanjë, por në atë operacion përfundoi duke sulmuar dhe vrarë një figurë të krimit të organizuar në Lion për një histori borxhesh të papaguara.
Ish-futbollisti ka rrëfyer gjithçka para hetuesve, duke shpjeguar se ka qenë “nën ndikimin e drogës” dhe se ka vepruar gjatë një sherri në bodrumin e prindërve të tij pranë Lionit. Më parë dyshohet se bleu një shkop bejsbolli, i cili më vonë u bë arma e vrasjes.
Pas vrasjes së burrit të listuar si mafioz 44-vjeçar, autori pranoi gjatë marrjes në pyetje se e kishte çuar trupin e tij në Lancy, ku po qëndronte. Pasi nuk arriti ta varroste, dyshohet se e la në bagazhin e makinës së tij për disa ditë, të mbështjellë në një thes.
Më pas shkoi në Villeneuve, në Kantonin Vaud, dhe e transportoi trupin në një gomone, duke vozitur për të paktën dy orë në liqenin e Gjenevës, përpara se ta hidhte në ujë, për ta zhdukur përgjithmonë.
Brigada detare e Gjenevës deri më tani nuk ka gjetur trupa në liqen, por hetuesit kanë arritur të gjejnë konfirmimin e historisë së vrasësit, duke identifikuar gjurmët e blerjes së një kanoe me fryrje dhe vozitjen e saj në Liqenin e Gjenevës ditën e vrasjes.
