Në Bashkinë Fushë-Arrëz, situata e zjarrit në fshatin Xath ka shfaqur një përmirësim të dukshëm sot. Pas intensitetit alarmant të ditëve të kaluara, flakët tani janë nën kontroll dhe banesat nuk janë më në rrezik. Puna për shuarjen e plotë të zjarrit vazhdon, falë angazhimit të forcave të shumta në terren.
Aktualisht, në zonë janë të angazhuar 50 forca të ushtrisë me dy mjete zjarrfikëse, 15 efektivë të MZSH-së me dy mjete zjarrfikëse dhe dy bota uji, si dhe 18 inspektorë të shërbimit pyjor dhe 30 persona nga administratat lokale. Operacioni po zhvillohet me mbështetje nga Policia e Shtetit dhe përfaqësues të AKMC-së, me synimin për të vendosur nën kontroll çdo vatër aktive zjarri. Sipas autoriteteve, falë bashkëpunimit të mirë, situata po përmirësohet dhe pritet që brenda një kohe të shkurtër të arrihet izolimi i plotë i flakëve.
Ndërsa në Bashkinë Shkodër, një vatër zjarri mbetet aktive në fshatin Ura e Shtrejt, të cilin forcat po e monitorojnë vazhdimisht. Në bashkitë e tjera, si Malësi e Madhe, Vau Dejës dhe Pukë, deri tani nuk ka pasur raportime për probleme me zjarret.
Prefekti i Qarkut Shkodër, i angazhuar në ndjekjen e situatës, vazhdon të koordinojë me të gjitha strukturat lokale dhe qendrore për menaxhimin e emergjencave. Ai theksoi rëndësinë e bashkëpunimit në këto momente kritike, duke shprehur optimizëm për përmirësimin e mëtejshëm të situatës.
Ekipet e emergjencës dhe autoritetet po vazhdojnë punën për të siguruar mbrojtjen e përbashkët dhe stabilitetin në këtë periudhë sfiduese, duke shpresuar për një zgjidhje të shpejtë të situatës me zjarret që kanë prekur këto zona.
