Në samitin dyditor “Inteligjenca artificiale në shëndetësi” në Londër, ministrja e Shëndetësisë, Evis Sala, theksoi se shëndetësia globale po kalon në një fazë të re falë teknologjisë së avancuar. Ajo ndau eksperiencën e saj në imazherinë onkologjike dhe theksoi rëndësinë e inteligjencës artificiale (IA) në revolucionin shëndetësor, duke paraqitur vizionin e qeverisë shqiptare për digjitalizimin e sistemit shëndetësor.
Ministrja përshkroi spitalin e së ardhmes si një strukturë me infrastrukturë teknologjike të padukshme, një qendër të unifikuar të të dhënave të pacientëve, dhe zero barrë administrative për profesionistët, duke vendosur në qendër kujdesin ndaj pacientit. Gjatë panelit për integrimin e IA në praktikën klinike, ajo diskutoi mbi shembuj konkretë të përdorimit të teknologjisë për të lehtësuar ngarkesën administrative për klinicistët, sidomos në fushën e radiologjisë. Kjo përfshinte automatizimin e detyrave të përsëritura dhe optimizimin e planifikimeve, si dhe gjenerimin automatik të raporteve dhe përpunimin e dokumentacionit mjekësor nëpërmjet gjuhës natyrale.
Pjesëmarrës në këtë ngjarje ishin rreth 300 individë dhe 60 folës nga e gjithë bota, përfshirë politikëbërës, përfaqësues të teknologjisë mjekësore dhe akademikë, të cilët ndanë njohuri dhe studime rastesh për potencialin e IA-së në shëndetësi. Samiti shërbeu si një platformë për të diskutuar si teknologjia mund të përmirësojë shërbimet shëndetësore dhe të rrisë efikasitetin në trajtimin e pacientëve.
