Policia e Shtetit ka njoftuar se disa adresa elektronike të rreme po kërcënojnë qytetarët, duke pretenduar se ata janë nën hetim dhe se duhet të paraqiten në polici. Mesazhet dërgohen në emër të drejtorit të policisë, Ilir Proda, dhe përmbajnë kërcënime lidhur me hetime për krime kibernetike dhe narkotikë.
Në njoftimin zyrtar, policia thekson se disa individë të paidentifikuar kanë krijuar adresa emaili false, duke u pretenduar si struktura të Hetimit të Krimeve Kibernetike. Këto emaile përmbajnë mesazhe që kërkojnë që qytetarët të paraqiten brenda 24 orëve në polici, për t’u sqaruar për akuzat e supozuara.
Policia e Shtetit thekson se këto emaile janë të rreme dhe nuk kanë asnjë lidhje me të. Në njoftim bëhet e qartë se:
– Policia nuk dërgon njoftime zyrtare për hetime përmes emailit.
– Asnjë strukturë policore nuk kërkon që qytetarët të paraqiten në polici pa një thirrje zyrtare të firmosur dhe të protokolluar.
– Qëllimi i këtyre mesazheve është mashtrimi dhe frikësimi i qytetarëve.
Duke iu bërë thirrje qytetarëve, policia inkurajon që të mos iu përgjigjen këtyre emaileve dhe të mos i shpërndajnë ato. Rasti është aktualisht në hetim nga Drejtoria e Hetimit të Krimeve Kibernetike, e cila po punon për identifikimin dhe ndëshkimin e autorëve të këtyre veprimeve kriminale.
Ky paralajmërim vjen në një kohë kur shpërndarja e informacionit të rremë dhe krimet kibernetike po rriten, duke shtuar nevojën për vigjilencë nga ana e qytetarëve. Policia e Shtetit vazhdon të punojë për sigurinë e shoqërisë dhe për të mbrojtur qytetarët nga kërcënime të tilla.
