Ibrahim Lici, që është shpallur në kërkim për 3 vrasje, atë të Endri Mustafajt, e të vëllezërve Astrit dhe Brahim Bilali, ka thyer heshtjen. Pasi emri i tij prej 3 ditësh futi në polemika institucionet dhe mediat, ai thotë se është i lirë në Turqi. Ai jo vetëm që përgënjeshtron arrestimin, por këmbëngul në pafajësi, duke u bërë thirrje institucioneve të zbardhin ngjarjet për të cilat ai ndodhet në kërkim, dhe të çojnë para drejtësisë autorët
Kjo është shkresa e Prokurorisë së Përgjithshme drejtuar Prokurorisë së Shkodrës, që ngjalli polemika dhe paqartësi mbi një nga emrat më të përfolur të botës së krimit, Ibrahim Licit dhe arrestimit ose jo të tij.
Por kur kishin kaluar 3 ditë, vetë Ibrahim Lici do ta bënte ende më të komplikuar situatën. Familjarët shpërndanë për mediat një regjistrim audio ku pretendojnë se është Ibrahim Lici, teksa ky i fundit deklaron se jo vetëm që nuk është arrestuar, por kërkon nga autoritetet shqiptare të zbardhin ngjarjet për të cilat ai është lakuar si i përfshirë, duke pretenduar pafajësinë.
“Jam i lirë. Nuk jam arrestuar. Lidhur me ngjarjen për të cilën akuzohem, për vrasjen e Endri Mustafës, kam dorëzuar kamerat në prokurori dhe vërtetohet me anë të qelizave telefonike, kam qenë në Tiranë në momentin që ka ndodhur ngjarja. Kjo është e vërtetuar edhe me pamje filmike. Unë pres vendimin e gjykatës për të zbardhur ngjarjen dhe për të çuar përpara drejtësisë autorët e vërtetë. Edhe për vrasjen e vëllezërve Bilali nuk kam qenë asnjëherë nën hetim nga prokuroria dhe jam shpallur në kërkim policor vetëm si person për t’u marrë në pyetje, si person që mund të kem dijeni për rrethanat e hetimit. Nuk kam pasur asnjëherë konflikt me vëllezërit Bilali. Është shumë e çuditshme të kërkohet ekstradimi im në një kohë që nuk jam arrestuar. Unë i bëj thirrje policisë të dalin në deklaratë se ku dhe kur më ka arrestuar sepse unë jam i lirë dhe në pritje të drejtësisë. Jetoj i lirë në Turqi dhe pres të zbardhet ngjarja”.
Ibrahim Lici ndodhet në kërkim ndërkombëtar dhe emri i tij gjendet krah personazheve më të rrezikshme të botës së krimit për të cilët policia kishte vënë në dispozicion një shumë të majme parash për këdo që jepte informacion mbi vendndodhjen e tyre. I riu shkodran, që rezulton të jetë djali i ish-këshilltarit bashkiak Mustafa Lici, ndodhet në kërkim për ekzekutimin me 6 plumba të Endri Mustafajt më 15 maj të vitit 2021, por gjithashtu dhe për vrasjen e vëllezërve Astrit dhe Brahim Bilali, marsin e vitit 2019 në Shkodër.
