Ish-drejtori i Urbanistikës në Bashkinë Lezhë, Sokol Toma, i shpallur në kërkim prej katër javësh, ka marrë miratimin për të ndërtuar një hotel gjigant në zonën e Shëngjinit.
Këshilli Kombëtar i Territorit, nën drejtimin e kryeministrit Edi Rama ka dhënë lejen për projektin “Rezidencë Turistike dhe Hotel”, me 16–26 kate mbi tokë dhe 8 kate nën tokë, në Malin e Shëngjinit.
Mësohet se leja i është akorduar kompanisë “S.T. Konstruksion” sh.p.k, e cila rezulton në pronësi të plotë të Tomës. Projekti konsiderohet një nga më të mëdhenjtë e zonës dhe parashikohet të ndryshojë profilin e Shëngjinit, një prej destinacioneve kryesore turistike të Lezhës.
Megjithatë, rrethanat e miratimit kanë ngritur pikëpyetje serioze, pasi Sokol Toma ka një sërë çështjesh të hapura me drejtësinë. Vetëm një muaj më parë, ai është shpallur në kërkim nga Policia e Lezhës për një aksident fatal në një nga kantieret e tij në zonën e Kunes, ku humbi jetën një 36-vjeçar i punësuar në të zezë, pasi ra nga lartësia. Hetimet paraprake tregojnë se objekti ndodhej në kushtet minimale të sigurisë teknike.
Toma ka qenë më herët i dënuar nga Gjykata e Posaçme, me kërkesë të SPAK, për akuzën e “shpërdorimit të detyrës” në tjetërsimin e mijëra metrave katrorë tokë në Shëngjin dhe Ranën e Hedhun. Dënimi iu konvertua në 2 vite shërbim prove dhe 5 vite përjashtim nga funksionet publike.
Pavarësisht se ende nuk ka përfunduar periudha e shërbimit të provës, ish-zyrtari vijon të jetë në kërkim për çështjen e aksidentit të fundit, çka sipas ligjit nënkupton se ai duhet të arrestohet dhe të vuajë fillimisht dënimin e mëparshëm, ndërsa më pas të përballet me akuzat e reja.
Ndërkohë, mbetet e paqartë se si do të vijojë procedura për ndërtimin e hotelit 26-katësh, teksa pronari i kompanisë ndërtuese është në kërkim dhe nën hetim për ngjarje me pasoja të rënda. Autoritetet nuk kanë dhënë ende një qëndrim zyrtar për këtë çështje.
