Një aksident tragjik ndodhi mbrëmjen e së enjtes në Durrës, ku një 18-vjeçare humbi jetën. Automjeti i tipit ‘BMW X5’ dyshohet të ketë qenë me shpejtësi të lartë, çka ka shkaktuar rënien e tij nga ura e Dajlanit.
Si pasojë e aksidentit, 18-vjeçarja vdiq, ndërsa drejtuesi i mjetit, një 26-vjeçar nga Fieri, u plagos rëndë dhe është shtruar në spital. Po ashtu, dy këmbësorë, 33 dhe 35 vjeç, përfunduan të plagosur. Shërbimet e Policisë dhe zjarrfikësit u angazhuan për të nxjerrë personat nga automjeti, ndërsa grupi hetimor ka nisur punën për të zbardhur rrethanat dhe shkaqet e këtij aksidenti.
Në vendin e ngjarjes, në mbikalimin e Urës së Dajlanit, aktualisht po kryhen punime riparuese. Ende nuk dihen shkaqet e sakta të aksidentit, megjithatë dyshohet se shpejtësia e lartë dhe një manovër e gabuar për të shmangur një pengesë hasur në rrugë e kanë bërë që mjeti të dalë jashtë kontrollit dhe të përfundojë poshtë mbikalimit. Policia vazhdon hetimet për këtë ngjarje tragjike, me qëllim identifikimin e shkaqeve të plota dhe ndëshkimin e të fajshëmve.
