Është dënuar me 10 vjet burg, Fadil Likaj, i riu nga Shkodra i cili në muajin 25 Shtator 2021 tentoi të vrasë në Vlorë, studenten K. Z. me të cilën kishte rënë në dashuri.
Treshja e gjyqtarëve kanë vendosur të pranojnë kërkesën e prokurorisë, duke deklaruar fajtor dhe dënuar fillimisht me 17 vjet heqje lirie të riun nga Shkodra.
Ky dënim është dhënë për akuzën e “Vrasjes me paramendim” mbetur në tentativë, “Mbajtje pa lejë të armëve” e municioneve dhe “Përndjekjes”.
Por për shkak të gjykimit të shkurtuar, masa e dënimit është reduktuar në 10 vjet heqje lirie.
Tashmë autori i krimit po bën orvatje për tu liruar në Gjykatën e Apelit Tiranë, me shpresën e uljes së dënimit duke synuar të shmangë akuzën e “Vrasjes me paramendim” mbetur në tentativë.
Sipas dosjes hetimore, gjithçka ka ndodhur pasi studentja nga Berati, K. Z., e kishte refuzuar duke mos pranuar të krijonte një lidhje intime me Fadil Likaj.
Në shenjë hakmarrje, Likaj ka udhëtuar nga Shkodra drejt Vlorës, ku ka kërkuar takim me vajzën. Sapo të dy janë ulur në ambientet e lokalit në Vlorë, Likaj ka nxjerrë nga çanta një granatë dore duke ja hedhur në tavolinë vajzës me të cilën po qëndronte.
Fatmirësisht granata nuk ka shpërthyer, pasi nëse do kishte plasur në lokal do dëmtoheshin dhe persona të tjerë. Por i riu shumë shpejt ka nxjerrë nga çanta një pistoletë “Zastava” dhe ka qëlluar në kokë studenten, duke e plagosur.
Studentja K.Z., teksa është pyetur në polici, ka pohuar faktin se ka rreth 1-javë që qëndronte në qytetin e Vlorës, pasi vazhdon studimet e larta në universitetin “Ismail Qemali”.
Studentja ka shtuar se kishte disa muaj që njihej dhe bisedonte kryesisht me anë të telefonit me Fadil Likaj, dhe se kohët e fundit kishte dashur ta ndërpriste këtë njohje, pasi sjellja e tij ka qenë e bezdisshme dhe shqetësuese për të dhe këtë fakt ia kishte komunikuar me telefon, Fadil Likajt.
Ky i fundit nuk e kishte pranuar vendimin e studentes dhe për këtë gjë ata e kishin lënë të takoheshin për herë të fundit në qytetin e Vlorës.
Ditën e ngjarjes në 25 shtator 2021, studentja ka pohuar në polici, se rreth orës 11:30-12:00 ka shkuar e vetme te lokal “C…” ku kishte menduar të takonte, Fadil Likaj.
Më pas aty ka ardhur dhe Fadili dhe së bashku janë ulur në një tavolinë në ambientin e brendshme.
Pasi janë takuar, studentja ka pohuar në polici se i ka thënë Fadil Likajt fjalët -“…çfarë ke për të më thënë pasi çdo gjë mes nesh ka marrë fund…!”.
Dhe pas kësaj pa thënë asnjë fjalë, Fadil Likaj, ka nxjerrë nga çanta e tij marsup një send që studentja, nuk e ka njohur se çfarë ishte, por e ka shquar si me formë vezake dhe ngjyrë të errët.
Këtij sendi studentja, ka pohuar se Fadil Likaj i ka hequr diçka dhe e ka hedhur përdhe pranë saj. E frikësuar nga ky veprim dhe nga ky send, studentja ka deklaruar se ka kërkuar ndihmë te personeli i lokalit dhe në këtë moment. Fadil Likaj, ka nxjerrë po nga çanta e tij marsup një pistoletë të vogël me ngjyrë gri dhe e ka qëlluar K. në pjesën e kokës.
Gjuajtje nga e cila ajo është rrëzuar në tokë. Në këtë moment, Fadil Likaj, sipas saj është larguar me vrap dhe pas tij është ngritur dhe ajo vetë dhe kishte konstatuar se nga koka po i dilte gjak.
K. nga goditja me armë ka pësuar një plagë gërvishtëse në pjesën e kokës, por pa i shkaktuar dëme serioze. Fadil Likaj, është munduar të largohet me shpejtësi, por i ka rënë pistoleta.
Ndërsa është ndaluar nga personat që ndodheshin të pranishëm në lokal, të cilët ju vunë nga pas, ku mes tyre ishte dhe oficeri i policisë Artur M.
