Juliand Halili, i njohur si Xhuliano Halili, një 44-vjeçar nga Tepelena, është konsideruar nga policia greke si një nga kriminelët më të rrezikshëm, me veprimtari brenda dhe jashtë burgjeve. Ai akuzohet për katër vrasje dhe një tentativë vrasjeje, ndërsa aktualisht po hetohet për vrasjen e fundit që ndodhi në burgun “Koridhalos”.
Halili ka vepruar nën urdhrat e Vasilis Varelas, një figurë e njohur dhe e lidhur me krimin e organizuar në Greqi, i njohur edhe për aktivitetin e tij në trafic droge. Varelas e detyroi Halilin të vriste ish-burrin e gruas së tij më 6 mars 2009. Edhe pse Halili e qëlloi viktimën dy herë në kokë dhe një herë në gjoks, ky i fundit mbijetoi pas disa operacioneve. Një atentat tjetër ishte organizuar ndaj tij më 5 gusht 2009, por dështoi.
Halili u hetua gjithashtu për vrasjen e Sotiri Psikopaida, një punonjës diskoje, më 11 nëntor 2008 në Kalamatë, ku ai e qëlloi atë katër herë, përfshirë një herë në kokë. Më 29 nëntor 2011, ai ekzekutoi Fillim Mesajën dhe djalin e tij dyvjeçar, Oligert Mesaja, gjithashtu nën urdhrat e Varelas. Vrasja ndodhi pranë lumit Pamiso dhe ishte pjesë e larjes së hesapeve mes Varelas dhe Mesajës.
Në vitin 2018, Halili u arratis nga një transport drejt burgut në Portin e Pireut, por u kap shpejt. Ngjarja më e fundit është një vrasje brenda burgut të Koridhalos në qershor 2024, ku ai vrau 35-vjeçarin Alfons Ndoci dhe plagosi 48-vjeçarin Altin Vokrri. Dyshohet se kjo vrasje ishte porositur me pagesë nga jashtë.
Halili vazhdon të mbetet një figurë e rrezikshme në botën e krimit dhe me një histori të gjatë të dhunës dhe lidhjeve kriminale.
