Rasti i Eugert Merizajt ka shkaktuar shqetësime të mëdha në Britani pasi ai ka përfituar rreth 20 mijë paund nga një transmetim të drejtpërdrejtë në TikTok, realizuar nga qelia e tij në një burg të Manchesterit. Merizaj, i dënuar për vrasje dhe me një dënim prej 32 vjetësh, arriti të grumbullonte këtë shumën në vetëm shtatë minuta, duke përdorur një telefon celular të futur ilegalisht në burg.
Gjatë transmetimit, Merizaj ndihmoi në aktivizimin e ndjekësve për të dërguar dhurata virtuale, të cilat konvertohen në para. Ai kishte mbi 45 mijë ndjekës dhe grumbulloi 5,429,625 pikë, që korrespondonin me shumën e fituar. Të ardhurat e tij dyshohet se janë depozituar në llogarinë bankare të një miku jashtë burgut.
Në transmetime të tjera, Merizaj shfaqej i veshur me rroba firmato dhe duke pirë cigare, teksa shprehte se autoritetet nuk mund ta deportonin në Shqipëri pa miratimin e tij. Ai ishte dënuar në vitin 2022 për vrasjen e Hemawand Ali Hussein, një ngjarje e ndodhur në vitin 2019.
Sipas rregullave të miratuara vitin e kaluar në Mbretërinë e Bashkuar, të burgosurit e huaj janë të detyruar të deportohen pas vuajtjes së një pjese të dënimit. Megjithatë, një gjykatë shqiptare ka pranuar transferimin e Merizajt për të vuajtur dënimin në Shqipëri, ku ai pritet të transferohet në burgun e Peqinit.
Politikani opozitar Nick Timothy reagoi ndaj situatës, duke theksuar se sistemi i drejtësisë duhet të ndëshkojë kriminelët dhe të mbrojë qytetarët. Pas këtij incidenti, TikTok njoftoi se kishte bllokuar të gjitha llogaritë e përdorura nga Merizaj dhe kishte pezulluar mundësinë e tërheqjes së fondeve.
Përfaqësuesi i Ministrisë britanike të Drejtësisë e quajti sjelljen e Merizajt të papranueshme dhe njoftoi se kishte nisur një hetim urgjent për të parandaluar futjen e sendeve të paligjshme në burgje.
