Në një mbrëmje historike për futbollin kazak, Kairat Almaty shkroi një kapitull të ri në historinë e tij duke eliminuar Celtic, një nga ekipet më të njohura të Skocisë, në një ndeshje emocionuese, duke siguruar kështu një vend në fazën e grupeve të Champions League për herë të parë. Stadiumi në Almaty shpërtheu në festë kur ekipit të Kairat i dhanë sinjalin përfundimtar, duke shënuar një moment që do të mbahet mend për një kohë të gjatë.
Heroi i mbrëmjes ishte portieri 21-vjeçar Temirlan Anarbekov, i cili, pavarësisht se ishte aktivizuar në minutat e fundit, tregoi guxim dhe aftësi të jashtëzakonshme duke pritur tre penallti të rëndësishme në “ruletën” finale. Ai arriti të ndalonte goditjet e Adam Idah, Luke McCowan dhe Daizen Maeda, ndërsa legjenda daneze Kasper Schmeichel e shikonte pa mundësi që të ndihmonte.
Gjatë 180 minutave lojë, Celtic ndonëse ishte më i përvojshëm, nuk arriti të shfaqte ide të qarta, duke u thyer përballë disiplinës dhe shpirtit luftarak të skuadrës së Kairat. Tifozët e ekipit shpalosën emocionet e tyre, shenjë e një ngjarjeje që kishte shumë më tepër se thjesht sport: kjo ishte një krenari kombëtare për Kazakistanin dhe një ëndërr e përmbushur për një qytet që për dekada ka ndjekur futbollin evropian nga distanca.
Ndërkohë, ky eliminim paraqet një goditje të rëndësishme për Celtic dhe trajnerin e tij Brendan Rodgers. Përveç humbjes sportive, ky rezultati sjell pasoja të rëndësishme financiare, pasi dështimi për në grupe e Champions League do t’i kushtojë klubit miliona euro.
Kairat Almaty, përveç se mposhti një gjigant të futbollit, dëshmoi se në botën e futbollit modern ka ende vend për mrekulli. Kjo ndeshje jo vetëm që do të mbahet mend si një arritje sportive, por si një moment i rëndësishëm për historinë e futbollit në Kazakistan.
