Kryeministri Edi Rama ka vazhduar kampanjën e tij në rrjetet sociale për të hequr lavazhet që ndodhen në mes të lagjeve në qytete. Në një video, ai shfaq një lavazh në një lagje të Tiranës dhe fton qytetarët, përkatësisht “çunat”, që të merren me heqjen e këtyre bizneseve, duke thënë se situata nuk mund të vazhdojë kështu.
Rama theksoi se nëse toka i përket pronarit të lavazhit, është e nevojshme që ata të marrin leje për të hapur një njësi shërbimi që i përmbush rregullat, dhe se lavazhet në rrugë nuk janë të pranueshme. Ai shtoi se pas heqjes së këtyre lavazheve, ato hapësira do të mbillen me pemë për të krijuar hapësira të gjelbra dhe të shëndetshme për komunitetin.
Në postimin e tij në Facebook, Rama i bëri thirrje pronarëve të lavazheve të veprojnë vetë për të shmangur gjobat, duke kërkuar që të respektojnë ligjin dhe të kontribuojnë në ambientin e tyre. “Po e patët tokën tuaj, merrni leje për një njësi shërbimi normale… Ndërsa deri atëherë, toka do rri bosh dhe pastër në shërbim të komunitetit,” pohoi ai. Në përfundim, informoi se nëse nuk kanë tokën e tyre, ato hapësira do të shndërrohen në zona të gjelbra që do të shërbejnë për lodra për fëmijët apo stola për të rriturit. Kjo nismë duket se është një përpjekje për të transformuar ambientin urban dhe për të krijuar hapësira më të mira për qytetarët.
