Presidenti i Sirisë, Ahmed Sharaa, ka mbërritur në Washington për një vizitë zyrtare, vetëm dy ditë pas heqjes së emrit të tij nga lista e personave të sanksionuar si “terrorist global” nga SHBA. Gjatë qëndrimit të tij, Sharaa do të takojë presidentin amerikan Donald Trump në Shtëpinë e Bardhë, në përpjekje për të forcuar bashkëpunimin mes dy vendeve pas ndryshimeve të fundit në Damask.
Vizita e Sharaas ndodh 11 muaj pas rrëzimit të regjimit të Bashar al-Assad, duke përfunduar më shumë se një dekadë luftë civile në Siri. Para mbërritjes së tij në Uashington, autoritetet siriane njoftuan se kishin arrestuar 71 persona të dyshuar si anëtarë të ISIS-it dhe kishin konfiskuar armë dhe eksplozivë. Temat kryesore të diskutimit pritet të jenë lufta kundër mbetjeve të ISIS-it dhe normalizimi i marrëdhënieve ndërkombëtare të Sirisë.
Më herët në shtator, Sharaa kërkoi heqjen e plotë të sanksioneve ndaj Sirisë në Asamblenë e Përgjithshme të OKB-së. Këtë javë, Këshilli i Sigurimit miratoi një rezolutë amerikane që lehtëson masat ndëshkuese ndaj Sirisë, duke hapur mundësi për rifillimin e marrëdhënieve ekonomike dhe diplomatike. Departamenti amerikan i Thesarit konfirmoi gjithashtu se Sharaa dhe ministri i tij i Brendshëm ishin hequr nga lista e dyshuarve për mbështetje të terrorizmit.
Sharaa, i njohur më parë si Muhammad al-Jaëlani, ka qenë komandant i Hayat Tahrir al-Sham (HTS), një grup që dikur ishte i lidhur me Al-Kaedën, por që u shkëput prej saj në vitin 2016. Megjithë të kaluarën e tij si militant, ai është mbështetur nga disa qeveri perëndimore për qëndrimin e tij më të moderuar dhe përpjekjet për të përfshirë grupet etnike dhe fetare në qeverisjen e re të Sirisë.
Në muajt e fundit, Sharaa ka përjetuar përleshje të dhunshme mes grupeve lokale, përfshirë beduinë sunitë dhe milici druze, duke vënë në pikëpyetje aftësinë e tij për të rikthyer stabilitetin në vend.
