Grupi rus i hakerëve “Fancy Bear” ka komprometuar të dhënat e disa institucioneve ushtarake serbe, duke përfshirë Ministrinë e Mbrojtjes, Akademinë Ushtarake dhe Akademinë Mjekësore Ushtarake. Sipas raportimeve të Radio Evropa e Lirë, institucionet amerikane dhe britanike lidhen këtë grup me shërbimin e inteligjencës ushtarake ruse, GRU. Organizata “Ctrl Alt Intel” e ka konfirmuar se ka akses në dosjet e ruajtura në serverat e hakerëve.
Analiza e këtyre dosjeve ka zbuluar se hakerët kanë grumbulluar të dhëna nga llogaritë e emailit të institucioneve serbe. Në veçanti, katër llogari të Ministrisë së Mbrojtjes kishin vendosur dërgimin automatik të emaileve në adresa të tjera, duke mundësuar kështu monitorimin e komunikimeve elektronike. Sulmi mund të ketë filluar që në tetor të vitit 2024 dhe disa nga llogaritë mund të jenë ende të komprometuara, sipas studiuesit Ben Folland. “Fancy Bear” është aktiv prej më shumë se një dekade.
Ky grup, i njohur gjithashtu si “Forest Blizzard”, ka si objektiv qeveritë, organizatat joqeveritare, kompanitë teknologjike dhe universitetet. Qendra britanike për sigurinë kibernetike është e bindur për lidhjet e këtij grupi me GRU-në ruse.
Metoda kryesore e sulmeve të “Fancy Bear” përfshin “spear phishing”, që përbën mesazhe të personalizuara që mashtrojnë viktimat për të hapur skedarë, duke u dhënë hakerëve qasje në sistemet e brendshme. Serbia duket se është bërë objekt interesi për shërbimet ruse në maj dhe qershor të vitit 2025, pas njoftimeve për eksportin e municioneve nga Beogradi drejt Ukrainës.
Kjo situatë vjen në një kontekst të tensioneve të rritura ndërkombëtare dhe ndihmon për të ilustruar rrezikun e vazhdueshëm të sulmeve kibernetike nga aktorë shtetërorë si Rusia.
