Vetëm disa orë pas deklaratës së kryeministrit grek Kyriakos Mitsotakis nga Parisi, ku shpalli se Greqia “po hap një faqe të re” në shqyrtimin e energjisë bërthamore, vendi është përfshirë nga reagime të forta politike e shkencore. Në samitin e Energjisë Bërthamore, Mitsotakis theksoi se Athina do të studiojë një rol potencial të reaktorëve të vegjël modularë në sistemin energjetik, por nuk u angazhua për ndërtimin e qendrave bërthamore.
“Greqia po hap një faqe të re. Ka ardhur koha që vendi im të shqyrtojë nëse energjia bërthamore, veçanërisht reaktorët e vegjël, mund të luajnë një rol në sistemin energjetik grek,” tha ai.
Disa specialistë të energjisë në Greqi e konsiderojnë hapjen e këtij debati si të nevojshme, duke theksuar përmirësimin e sigurisë së teknologjisë bërthamore moderne. Sipas tyre, kjo mund të funksionojë si burim bazë që plotëson energjinë nga burimet e rinovueshme. Megjithatë, ekspertë të tjerë paralajmërojnë se një vendim i tillë do të kërkonte vite studimi, konsensus politik dhe shoqëror, si dhe investime të konsiderueshme.
Reagimet politike janë gjithashtu të shumta. Socialistët e PASOK-ut e akuzojnë qeverinë për kontradikta dhe mungesë strategjie, duke theksuar se energjia bërthamore do ta rrisë varësinë e vendit nga jashtë, për shkak të kontrollit të karburanteve dhe menaxhimit të mbetjeve nga vende të tjera. Sipas tyre, kostot e energjisë bërthamore janë më të larta se ato të energjisë së rinovueshme, dhe sugjerojnë investime në alternativa si magazinimi i energjisë dhe gjeotermia.
Po ashtu, opozita e SYRIZA-s e kundërshton kategorikisht idenë, duke argumentuar se energjia bërthamore është rrezikshme për një vend sizmik si Greqia dhe e paangazhuar me modelin e zhvillimit të qëndrueshëm. Këto diskutime në lidhje me energjinë bërthamore vazhdojnë të mbeten një temë e ndjeshme dhe delikate për politikën greke.
