Një grabitje e organizuar ka tronditur provincën e Reggio Calabria-s, kur një grup komando ka sulmuar një automjet të blinduar në një segment të autostradës. Sipas vlerësimeve paraprake, sasia e parave të grabitura arrin rreth dy milionë euro. Ngjarja ndodhi brenda një tuneli ndërmjet kryqëzimeve Scilla dhe Bagnara, në drejtim të veriut.
Kriminelët, pas një sulmi të shpejtë, arritën të ndalonin automjetin e blinduar. Gjatë incidentit, u dëgjuan të shtëna armësh, por fatmirësisht, askush nga punonjësit që ndodheshin brenda furgonit nuk u plagos. Për të bllokuar trafikun dhe për të parandalauar çdo ndihmë, autorët vendosën dy makina të djegura në rrugë dhe shpërndanë gofla metalike në asfalt, duke shkaktuar një bllokim total të qarkullimit dhe duke penguar largimin e automjetit të blinduar.
Pas ngjarjes, në vendngjarje menjëherë ndërhynë zjarrfikësit dhe patrullat e policisë, të cilët siguruan zonën dhe nisën hetimet për identifikimin e autorëve. Sulmi tregon një nivel të lartë organizimi dhe policia po vazhdon punën për të zbardhur plotësisht ngjarjen. Autoritetet kanë shprehur shqetësim për mënyrën e realizimit të këtij operacioni të sofistikuar dhe për ndikimin e tij në sigurinë publike.
