Dy vëllezër të akuzuar për vrasjen e gazetares malteze, Daphne Caruana Galizia u deklaruan fajtorë këtë të premte, gjatë seancës gjyqësore në Valleta.
“Ata pranuan fajësinë”, raporton AFP duke cituar avokatin e Alfred dhe George Degiorgio, Simon Michallef Stafrace.
Më herët vëllezërit Degiorgio, të dyshuar për planifikimin dhe vendosjen e bombës që vrau gazetaren, ishin deklaruar të pafajshëm.
Por gjatë procesit, ata ndryshuan deklaratat e tyre duke pranuar fajësinë në këmbim të një dënimi më të butë.
Daphne Caruana Galizia denoncoi në blogun e saj Running Commentary korrupsionin në vendin e vogël në Mesdhe, një ish-koloni britanike që iu bashkua Bashkimit Europian në 2004-ën. Vdekja e saj në moshën 53 vjeçare më 16 tetor 2017 përhapi një valë indinjate në komunitetin ndërkombëtar që detyruan kryeministrin e asaj kohe të japë dorëheqjen.
Ajo ekspozoi lidhjet korruptive të politikanëve të lartë të vendit, kryesisht gjatë skandalit të “Panama Papers”.
Në një intervistë për Reuters më herët këtë vit, George Digiorgio rrëfeu krimin. Një avokat i vëllezërve tha se të dy ata kërkonin faljen në kërkim të rrëfimit për vrasjet, eksplozivet dhe krimet e tjera.
