Procesi i apelit për tentimin e zhvatjes ndaj familjes së Michael Schumacher ka marrë një zhvillim të rëndësishëm, pasi gjykatësi Markus Quantius e cilësoi çështjen si “një turp absolut”. Familja Schumacher u kërcënua se do të publikoheshin foto dhe video private të legjendës së Formula 1 në Darknet, nëse nuk paguheshin 15 milionë euro. Michael Schumacher, i cili ka qëndruar larg jetës publike pas aksidentit me ski në vitin 2013, është në qendër të kësaj ngjarjeje të dhunshme.
Gjatë procesit në gjykatën e Wuppertalit, autori kryesor, një 54-vjeçar me precedent penal, u dënua me tri vite burg për tentativë zhvatjeje në rrethana veçanërisht të rënda. Një ish-punonjës i sigurisë së familjes, gjithashtu 54 vjeç, mori një dënim me dy vite me kusht dhe një gjobë prej 2,400 eurosh për bashkëpunim. Pala civile ka kërkuar tani që ky i fundit të njohët si bashkëautor i plotë dhe të rritet dënimi i tij në katër vite burg.
Gjatë seancës, 31-vjeçari, djali i njërit prej të pandehurve, tërhoqi menjëherë ankesën, duke e bërë përfundimtare dënimin e tij me gjashtë muaj me kusht. Tani, në sallë janë mbetur vetëm dy të pandehur. Gjykatësi Quantius theksoi se është e pamundur që ish-punonjësi i sigurisë të dalë pa dënim, por ai sqaroi se nuk ka prova për përfshirje direkte apo përfitim financiar nga krimi.
Ndërkohë, të pandehurit kanë njoftuar se nuk do të japin deklarata të reja në apel, duke hedhur poshtë mundësitë për elemente të tjera akuze. Procesi pritet të vazhdojë edhe për katër ditë të tjera, deri në fillim të dhjetorit, për të përmbyllur këtë rast të ndjeshëm dhe me ndikim në jetët e të gjithë atyre të përfshirë.
