Lefkothea Karasa, e moshuara 82 vjeçare që u sorollat me muaj në dyert e Gjykatës së Vlorës, nga sot është e lirë dhe nuk ka asnjë akuzë mbi shpinë. Ajo u procedua disa muaj më parë nga Policia e qytetit bregdetar, me akuzën e ndërtimit të paligjshëm të një koteci pulash.
Këtë të enjte, Gjykata e Vlorës ka rrëzuar akuzat ndaj 82-vjeçares. Lefkothea Karasa jeton e vetme në një shtëpi dykatëshe në Nartë të Vlorës, ndërsa djemtë i ka në emigracion. Para dy vitesh, i shembën kasollen e bagëtive dhe ajo nisi ndërtimin e një tjetre, me mure.
Këtu lindi konflikti me fqinjën që e denoncoi në polici. Rasti shkoi në Prokurorinë e Vlorës dhe kjo e fundit e akuzoi 82 vjeçaren për veprën penale “Ndërtimi i paligjshëm i një objekti në tokën e vet”.
“Problemi është se më ra halli në pronën time, në tokën time që ma ka lënë vjehrri. Shtëpinë e kanë ndërtuar djemtë me punën në Greqi. Dy vite që është bërë dhe ka kushtuar shumë. Atje kishim një kasolle dhe duam ta bëjmë të madhe.
Kotec për pula a ndonjë tjetër, çfarë të bëjmë duhet ajo…(ndërtesa). Asgjë si kam prishur asaj (komshies) ajo më ka prishur mua gardhin. Erdhi policia më mori mua me forcë. Ne e kemi në tokën tonë”, tregoi Lefkothea Karasa, muaj më parë kur e shoqëruan në Policinë e Vlorës.
