TIRANË- Gjykata e Posaçme kundër Korrupsionit dhe Krimit të Organizuar ka shtyrë për në datën 26 korrik, seancën paraprake për ish-ministrin e Shëndetësisë, Ilir Beqajt dhe të pandehurve të tjerë për dosjen e Sterilizimit. Shtyrja për seancën paraprake është bërë me kërkesë të avokatëve të të paditurve, të cilët kanë kërkuar më shumë kohë për t’u njohur me dosjen pasi ende nuk kanë përfunduar së lexuar fashikujt e saj. Sipas tyre, deri më tani, kanë arritur në fashikullin e 20 nga më shumë se 600 që ka dosja e plotë.
Ish-ministri i Shëndetësisë Ilir Beqaj është vënë nën hetim nga SPAK prej një viti. Beqaj është i dyshuar për shpërdorim detyre lidhur me 2 tendera të firmosura, për sterilizimin dhe check up. Këto 2 çështje janë duke u hetuar nga 3 prokurorë. Koncensionin e sterilizimit po e hetojnë prokurorët Edvin Kondilli dhe Ened Nakuçi, ndërsa atë të ‘check up’ po e heton prokurorja Elida Kaçkini. Më 18 mars SPAK njoftoi mbylljen e hetimeve, ndërsa iu komunikoi akuzat 8 personave të tjerë të përfshirë në dosjen e sterilizimit.
