Prej mëngjesit të kësaj të premte faqja zyrtare e një nga institucioneve më të rëndësishme, Bashkisë së Tiranës, është në “kolaps”.
Hakerat iraniane arritën që të futen në sistemet kompjuterike të këtij institucioni duke marrë në duart e tyre faqen zyrtare.
Disa orë pas postimit të parë të grupit të hakerave “Homeland Justice”, një tjetër reagim ka ardhur nga këta të fundit duke informuar qytetarët se tanimë të gjitha të dhënat e Bashkisë së Tiranës janë në dispozicion të tyre dhe ky sulm ka ardhur si pasojë e mbështetjes që vendi ynë sipas tyre u jep “terroristëve të MEK”
“Bashkia e dashur e Tiranës është e jona tani! Gjithë ky korrupsion i frikshëm për një bashki të thjeshtë?! E pabesueshme! Ja çfarë ndodh kur pjesa më e madhe e buxhetit tuaj i dedikohet mirëqenies së terroristëve të MEK-ut”, shkruajnë ata duke treguar përmes një foto se serverat e Bashkisë së Tiranës tanimë janë në kontroll të plotë të tyre.
Prej orëve të para të paradites së kësaj të premte faqja zyrtare e Bashkisë së Tiranës është e paaeksesueshme. Ky sulm “paralizon” kështu punën në këtë institucion si dhe regjistrimin e fëmijëve në kopshte dhe çerdhe pasi ky proces kryhet online te faqja e Bashkisë dhe data e fundit e afatit është 22 qershor.
Sulmi i grupit iranian vjen në një kohë kur kryebashkiaku i Tiranës, Erion Veliaj ndodhet në qeli dhe ky institucion është duke u drejtuar përkohësisht nga kryetarja e komanduar, Anuela Ristani.
Kjo nuk është hera ë parë që grupi “Homeland Justice” kryen sulme kibernetike në Shqipëri. Rreth dy vite më parë ata kishin në “shënjestër” instititucionet shqiptare, ku madje publikuan dhe kartat e ID dhe informacione konfidenciale të qytetarëve.
