Rruga që lidh lagjet Manalat i Parë dhe Manalat i Dytë në Gjirokastër është bllokuar për shkak të një rrëshqitjeje të madhe dheu, duke prekur rreth 12 mijë banorë të këtyre lagjeve. Situata ka vështirësuar jetën e përditshme, teksa banorët janë detyruar të lëvizin në këmbë nëpër shtigje të improvizuara për të përfituar shërbime të nevojshme.
Një problem veçanërisht i madh është situata për 170 fëmijë që ndjekin shkollën “Naim Frashëri”. Ata janë të detyruar të kalojnë çdo ditë përmes rrugëve të dëmtuara dhe terreneve të vështira, duke rrezikuar sigurinë e tyre. Ky problem është intensifikuar pas bllokimit të rrugës kryesore që lidh lagjet, e cila ka bërë të pamundur qarkullimin normal të mjeteve.
Banorët kërkojnë ndërhyrje të menjëhershme për pastrimin e masivit të dherave dhe rehabilitimin e rrugës. Bashkia e Gjirokastrës ka njoftuar se po pret një raport nga Shërbimi Gjeologjik, i cili ka kryer studime jo vetëm në këtë zonë problematike, por edhe në disa pika të tjera të qytetit, ku janë evidentuar rrëshqitje të tjera të dheut.
Ndërkohë, ndihma emergjente dhe zgjidhjet afatgjata mbeten të domosdoshme për të rikthyer normalitetin dhe sigurinë për këta banorë.
