Autoritetet gjermane kanë sekuestruar 280 kilogramë kokainë të trafikuar nga një anije mallrash e Amerikës së Jugut pas një bastisjeje në portin Brake, në lagjen Uesermarsch. Forcat speciale të Departamentit Qendror të Hetimeve Kriminale në Oldenburg kanë arrestuar gjashtë të dyshuar, mes të cilëve shqiptarë, njofton Crime Intel.
Tre zhytës u arrestuan gjithashtu, të dyshuar se tentuan të rikuperonin kokainën pranë portit të destinacionit Brake, në Gjermaninë veriperëndimore, që është pjesë e rrjetit të transportit trans-evropian të Bashkimit Evropian. Gjithashtu, disa persona u arrestuan mëngjesin e së hënës, pas disa kontrolleve në shtëpi, të dyshuar për import të paligjshëm të drogës në Gjermani.
Në mesin e të dyshuarve, të moshës nga 38 deri në 65 vjeç, janë rumunë, shqiptarë dhe kolumbianë, njoftoi Zyra e Hetimit Doganor të Hanoverit në një deklaratë për shtyp me zyrën e policisë dhe prokurorisë në Oldenburg.
Në orët e para të 3 marsit 2025, forcat speciale nga Zyra e Policisë Kriminale të Shtetit të Saksonisë së Poshtme dhe Zyra Qendrore e Policisë Kriminale në Oldenburg arrestuan disa persona të cilët dyshohen se sillnin sasi të mëdha kokaine në Gjermani përmes detit.
Gjatë hetimeve të mëparshme nga Grupi i Përbashkët i Hetimit të Narkotikëve (GER) të Departamentit Qendror të Hetimit Kriminal në Oldenburg dhe Zyrës së Hetimit Doganor në Hanover, u konfirmua se një sasi e madhe kokaine ishte ngarkuar në një transportues me shumicë nga Amerika e Jugut dhe se kishte gjasa të kapej në destinacionin e saj në portin Brake.
Tre zhytës kanë hyrë në ujë natën e 3 marsit 2025 për të kapur lëndën narkotike. Menjëherë pas kësaj, forcat speciale arrestuan gjashtë persona, përfshirë tre zhytësit. Në bykun e anijes u gjetën disa pako droge me gjithsej 280 kilogramë kokainë.
Të dyshuarit janë sjellë para gjykatësit dhe katër nga gjashtë personat tashmë janë arrestuar. Hetimet e mëtejshme, të udhëhequra nga Zyra e Prokurorit Publik të Oldenburgut, janë në vazhdim.
