E motra e Gjergj (Xherxh) Laçit i ka dalë në mbrojtje të vëllait, i cili u arrestua, pasi dhunoi dhe ngujoi bashkëshorten e dy fëmijët e tij për 6 vite. Rita Kaca është shprehur se vëllai i saj nuk ka probleme me shëndetin mendor, duke shtuar se Laçi akuzohet nga familja, pasi sipas saj “duan të bredhin.”
“Ata janë pa rrogë, pa asgjë. Erjon Veliaj ça bën? Pse nuk e mori atë familje që ti çonte në punë. I le qeveria deri sa të denoncohet. Pse të shkojë atje, ai të shkojë në punë. T’ja çojnë në shkollë bashkinë. Gruan t’ja çojnë në punë, t’i gjejnë pastruese në bashki. Ta ndihmojnë këtë familje. Ne jemi në punë, tërë kohës punojnë. Ky t’i qesë këta? Te katër rrugët e Shijakut? Ka dhënë urdhër me e prish shtëpinë.
Gjergji është fiks fare me trunin, s’ka asnjë sëmundje, është vetëm me diabet. Kështu ka thënë doktori. Të shkojnë të arrestojnë doktorin. Nuk i ka dhunuar fare. Ata pretendojnë të dalin, të bredhin rrugëve. S’e ka dhunuar. Ata t’i marrë shteti t’i çojë në gjimnaz. Shtëpinë janë duke ja prishur. Specialist është. Shkollën e lartë ka mbaruar Gjergji. Profesor ka mbaruar Gjergji. Gjergji është njish fare, i marrshin të keqen kush e shan.”, u shpreh e motra.
“Gjergj Laçi është djali më i mirë që ekziston në rruzullin tokë. Nuk e ka rrah nuk ka shenja dhune. Ajo do të shkojë prostitutë në Francë”- shtoi motra e Gjergj Laçit.
Po ashtu edhe vëllai i 52-vjeçarit, Bekim Laçi në një intervistë për “Shqipëria Live” është shprehur se kohët e fundit familja e tyre ishte e mërzitur.
Lidhur me çarçafët e varur në ballkon, Bekimi u shpreh se ato nuk janë vendosur, që fëmijët dhe gruaja të mos shiheshin nga jashtë, por janë vendosur nga punëtorët që po bënin punime në shtëpi.
“Kohët e fundit kanë qenë pak të mërzitur. Djemtë donin të ishin si bashkëmoshatarët e tyre, donin celularë të fundit. Ne kaq mundësi kishim, duhet të shtrijmë këmbët sa kemi jorganin, jo me kërku qiqra në hell. Unë kam kaq vite që punoj dhe kam një telefon të thjeshtë”, është shprehur vëllai i 52-vjeçarit të arrestuar në Tiranë.
Bekim Laçi ka mohuar kategorikisht që i vëllai, Gjergj Laçi të kishte ushtruar dhunë ndaj gruas dhe fëmijëve të tij.
