Nënkryetari i Partisë Demokratike, Agron Gjekmarkaj, komentoi në një lidhje live me studion e lajmeve në Neës24, tensionet e sotme Komisionin Hetimor të Shëndetësisë, duke theksuar se “dhuna më e madhe është provokimi konstant që mazhoranca po i bën opozitës.” Ai u bëri thirrje kolegëve socialistë “t’i thërrasin mendjes, sepse Shqipëria nuk është pronë e tyre.”
Gjekmarkaj e cilësoi protestën e 7 tetorit “një nga më uniket dhe më madhështoret,” duke theksuar se ajo shprehu ndjenjat e shqiptarëve për qeverinë dhe arrestimet e opozitarëve. Ai tregoi se në mbledhjet e Grupit Parlamentar të PD-së diskutohet për “përballje, rezistencë dhe komunikim të vazhdueshëm me ndërkombëtarët,” me qëllim arritjen e një qeverie teknike.
Ai gjithashtu komentoi deklaratat e një deputeti gjerman, duke thënë se nëse Gjermania do të përballej me skandale të ngjashme, shoqëria gjermane do të reagonte me më shumë forcë në mbrojtje të kushtetutës.
