Arratisja e 38-vjeçarit Altin Ndoci, i cili ka një skedë të rëndë kriminale, ndodhi pas një planifikimi disa mujor. Ai përdori një strategji duke e simuluar një sëmundje akute, duke pretenduar se kishte krizë në veshka, gjë që e detyroi policinë e burgjeve ta transferonte në spitalin e Durrësit, në vend të atij të Tiranës. Gjatë vizitave të tij në repartin infektiv, Ndoci identifikoi hapësirat që do t’i shërbenin për arratisje.
Më pas, me ndihmën e disa bashkëpunëtorëve, ai u largua me një makinë nga spitali dhe humbi gjurmët. Ndërkohë që Ndoci është i lirë, ministri i Drejtësisë, Besfort Lamallari, firmosi shkarkimin e drejtorit të Burgut të Durrësit, Indrit Cërloj, dhe të gjithë zinxhirit komandues të këtij institucioni.
Po ashtu, janë arrestuar 8 persona, përfshirë zv. shefin e Policisë së Burgut, Desdemon Pazaj, shefen e informacionit Violeta Uka, dhe pesë efektivë që shoqëronin Ndocin. Aulon Çuko, kryeinfermer në spital, u ndalua për plotësim fiktiv të dokumentacionit mjekësor që justifikonte vizitat e Ndocit.
Akuzat ndaj punonjësve të policisë së burgjeve përfshijnë moszbatimin e detyrave, pasi ata nuk i vunë prangat gjatë shoqërimit. Kërkesa e Ndocit për të shkuar në tualet pas vizitës shërbeu si pikënisje për arratisjen e tij. Ai shtyu policin dhe doli nga ambientet spitalore në parking, ku e priste një automjet Audi dhe një tjetër që e shoqëronte.
Policia po analizojnë kamerat e sigurisë për të ndjekur itinerarin e Ndocit pas arratisjes, dhe gjurmët e tij të fundit janë identifikuar në Spitallë, ku janë regjistruar imazhe të automjetit me të cilin ai iku. Ndërkohë, situata ka ngritur shqetësime të mëdha për sigurinë në sistemin e burgjeve.
