TIRANË- Ka përfunduar seanca e radhës në Gjykatën e Posaçme për çështjen Gërdeci, në fundin e të cilës, ish-ministri i mbrojtjes akuzoi prokurorinë e posaçme për zvarritjen e procesit. Mediu tha se SPAK, duhet të mundësonte me çdo kusht marrjen në pyetje të ish-shefit të shtabit të përgjithshëm Luan Hoxha, i cili prej disa vitesh jeton në SHBA. GJKKO ka vendosur që të administrojë dëshminë që Hoxha ka dhënë në vitin 2009, që për Mediun u konsiderua e papranueshme.
Mediu i qëndroi variantin që ka dhënë edhe më herët para medias, se ministri i mbrotjes nuk ka pasur përgjegjësi për koordinimin e punës në fabrikën e demontimin të armëve, dhe se ajo ishte detyrë e ushtarakëve të linjës.
Mediu tha se SPAK po tenton që ta çojë procesin drejt absurdit, pa marrë në pyetje, personat që janë miratuar fillimisht, kur çështja u rihap.
“Ashtu siç u kërkua thirrja e dëshmitarëve, prokuroria ka sjellë një volum shkresash pa përcaktuar asgjë. Por pa përcaktuar dhe përgjegjësitë e ministrit. U tha se ishte salduar një karrocë. I kërkuam prokurorisë që të na thotë se ku është përgjegjësia e ministrit në kuadër të shpërdorimit të detyrës. Nëse nuk hyhet në thelb të së vërtetës, mendoj se është një proces që të kalohet te procesi i radhës. Procesi po shkon drejt absurdit.
Se çfarë ka ndodhur në Gërdec njerëzit e dinë shumë mirë. Unë duhet të analizoj ekspertizat, qoftë të ekspertëve amerikanë, që kanë lënë 5 shkaqe të ndryshme për shpërthimin, qoftë të atyre shqiptarë. Ekspertimi tekniko financiar nuk ka pse bëhet më, e kanë pranuar që nuk ka dëm ekonomik.
E dinë shumë mirë që nuk merret ministri me kalibrat, kanë qenë ushtarakët që e kanë dëshmuar këtë në gjyq. Nëse nuk merren në konsideratë dëshmitë e tyre, atëherë pse i thërresin në gjykatë.
Unë kam rezerva për procesin, se dëshmitarët kryesorë nuk kanë pranuar që të pyeten. Shefi i shtabit, duhet të vijë këtu dhe të shprehet. Si qenka kaq e vështirë që të gjendet adresa e një personi që jeton në SHBA, me të cilin avokati ka komunikim lehtësisht. Duhet të pyetet, qoftë edhe përmes një videokonference. Nuk mund të merren parasysh deklarata të bëra shumë vite më parë, në favor të mbrojtjes së tij personale”, tha Mediu.
Mediu po hetohet për shpërdorim detyre në lidhje me vdekjen e 26 personave dhe plagosjen e qindra të tjerëve pas shpërthimit që ndodhi në fabrikën e demontimit të armëve në Gërdec, në 15 mars të vitit 2008.
