Policia e Vlorës ka arrestuar 42-vjeçarin Flodian Plaku, i cili ishte shpallur në kërkim për vrasjen e Gentjan Bejtjas, e ndodhur më 15 mars 2024 në Larushkë të Fushë Krujës. Arrestimi është realizuar në qytetin bregdetar të Vlorës nga forcat e policisë dhe drejtoria e Krimeve të Rënda. Flodian Plaku ka përdorur edhe mbiemrat Mamo dhe Serjani dhe njihet me nofkën “Pole Qorri”, ndërsa rezulton me precedentë të ndryshëm penalë.
Origjinai nga Vlora, ai ka jetuar për një kohë të gjatë në Greqi dhe Itali, dhe dyshohej se ishte fshehur në Dubai. Ai akuzohet si vrasës me pagesë në atentatin ndaj Gentjan Bejtjas. Katër ditë pas ngjarjes, policia arrestoi dy të dyshuar të tjerë, Ilir Beqaraj, alias Ilir Brahimi dhe Edison Haxhiu, si bashkëpunëtorë në ekzekutimin mafioz.
Plaku është gjithashtu i njohur si “koka” e një bande të trafikut të drogës, që operonte në Shqipëri dhe dërgonte lënde narkotike në Itali. Ai u arrestua për herë të parë në vitin 2019, ku u zbuluan gomone me kanabis që ngarkoheshin në Shqipëri dhe dërgoheshin në Brindizi; droga më pas shpërndahej nëpërmjet korrierëve në qytete si Roma, Napoli, Milani dhe Firenza. Hetimet për këtë rast vazhdojnë, ndërsa arrestimi i Plakut përfaqëson një tjetër hap të rëndësishëm në luftën kundër krimit të organizuar në rajon.
