Emisioni investigativ “Piranjat” i erdhi në ndihmë SPAK-ut, duke zbuluar se drejtuesit politikë të qarkut Fier nuk e kanë aspak frikë SPAK-un dhe as ndiejnë presion nga Prokuroria e Fierit se mund të hetohen për krime zgjedhore.
Grupi i xhirimit të “Piranjave”, së bashku me gazetaren Avi Mema, ndodhej në autobusin që solli njerëz nga Fieri në Tiranë për mitingun e hapjes së fushatës elektorale të PS-së më 12 prill.
Po kush ishte në autobusin e PS-së?
“Kishte persona me lista që thërrisnin një për një emrat për të hipur në autobus. Ajo që është e paligjshme është se ata ishin punonjës të administratës së Fierit, dhe gjatë dy orëve që ishim në autobus, kishte edhe persona që ishin sjellë nga këta punonjës. Pra, atyre jo vetëm që u ishte bërë presion për të qenë të pranishëm në mitingun e Tiranës, por edhe për të sjellë familjarët e tyre. Hareja, këngët dhe vallet ishin thjesht fasada e shëmtuar e mitingut të hapjes së fushatës së PS-së në Sheshin ‘Skënderbej’, pasi pamë një mungesë të theksuar dëshire nga ana e njerëzve për të qenë aty – ata ishin të detyruar për të ruajtur vendin e punës së tyre apo të familjarëve,” tha gazetarja Avi Mema për emisionin “Kafe Shqeto” në SYRI TV.
Gjatë udhëtimit për në Tiranë, Piranjat kanë folur me njerëz të thjeshtë, hallexhinj, dhe gjatë bisedave me ta kanë arritur të dokumentojnë me zë dhe figurë se si persona me pushtet i kanë detyruar të marrin pjesë në mitingun elektoral të PS-së, ose për t’u punësuar, ose për të ruajtur një vend pune – në kundërshtim me ligjin.
“Është faktuar me video, prova dhe me zë se si njerëzit janë të detyruar të shkojnë në këtë miting. Ka edhe nga ata që pranojnë se kanë pasur premtime të herëpashershme për një vend pune dhe kishin shpresë se pas prezencës në mitingun hapës do të merrnin një telefonatë për një punësim,” tha gazetarja.
Investigimin e plotë të “Piranjave” do ta ndiqni të premten në orën 20:44 në SYRI TV.
Pas këtyre provave të paraqitura nga “Piranjat”, është radha e drejtësisë të veprojë pa vonesë për zbërthimin e kësaj skeme kriminale elektorale.
