Belsh, Qershor 2025 – Një tjetër tender publik i mbuluar me dyshime për pabarazi, korrupsion dhe shkelje flagrante të parimeve të konkurrencës së ndershme po trondit Bashkinë Belsh. Bëhet fjalë për tenderin me objekt “Punime për rehabilitimin dhe rritjen e sigurisë së Digës Belsh dhe pastrimin e kanalit të shkarkimit (vaditës)”, me një fond limit prej 39,450,216 lekësh pa TVSH dhe me një konkurrencë formale të 12 operatorëve.
Tenderi, i shpallur më 16 tetor 2024 dhe mbajtur më 14 nëntor, përfundoi me shpalljen fitues të “Ergi SHPK”, e cila paraqiti një ofertë prej 24,367,806 lekësh pa TVSH – dukshëm më e ulët se fondi limit, por ajo që ngre shqetësim është mënyra e skualifikimit të 11 operatorëve të tjerë, përfshirë disa me kapacitete të provuara në sektor.
RedFlag në procedurë – Shkelje sistematike që ngrejnë dyshime serioze
Sipas filtrave analitikë të vendosur për identifikimin e tenderëve me rrezikshmëri për korrupsion dhe shkelje të ligjit, tenderi është kategorizuar me RedFlag, një sinjal alarmi që tregon për:
- Skualifikimin e të gjithë operatorëve konkurrues, përveç fituesit
- Skualifikimin e ofertës më të ulët
Këto praktika bien ndesh me frymën e ligjit për prokurimet publike dhe synimin për përdorim efikas dhe transparent të fondeve publike. Ato sugjerojnë një favorizim të hapur, të cilin burime brenda administratës së Bashkisë Belsh e lidhin me ndikimin e kryebashkiakut Arif Tafani, i cili dyshohet të ketë ndikuar në përzgjedhjen e fituesit përmes mekanizmave të njohur të manipulimit të kritereve teknike dhe administrative.
Çfarë fshihet pas “Ergi SHPK”?
Pavarësisht se kompania “Ergi SHPK” nuk rezulton të ketë pasur përfshirje të rëndësishme në projekte të kësaj natyre në të kaluarën, ajo është shpallur fituese në një procedurë ku përfshiheshin kompani me kapacitete të provuara si “Bajrami N.”, “BOE Drini-1 & Ndregjoni”, “Besta” dhe “Shendelli”.
Fakti që një kompani e tillë “ngrihet” mbi 11 të tjerë duke lënë pas operatorë me histori të gjatë në infrastrukturë, forcon dyshimet për konflikt interesi, favorizim dhe manipulim dokumentacionesh, për të cilat organet e hetimit duhet të ndërhyjnë menjëherë.
Kërkohet hetim i thelluar nga SPAK dhe KLSH
Me precedentët e mëparshëm të Bashkisë Belsh në çështje të ngjashme, ky tender duhet të jetë objekt auditimi nga KLSH dhe hetimi penal nga SPAK, për të zbuluar nëse kemi të bëjmë me një aferë të re korruptive ku fondet publike përdoren për interesa klienteliste.
Qytetarët e Belshit meritojnë transparencë. Fondet publike nuk janë pronë personale e kryebashkiakëve.
Në një periudhë të gjatë të udhëheqjes së tij në Bashkinë e Belshit, Arif Tafani ka shfrytëzuar pozitat e tij për të krijuar një sistem të mbyllur dhe klientelist, ku tenderët publikë janë përdorur si mjete për të favorizuar kompani të caktuara dhe për të pasuruar individë të lidhur ngushtë me administratën e tij.
Një nga shembujt më të spikatur të këtij abuzimi është tenderi për rehabilitimin dhe rritjen e sigurisë së Digës së Belshit dhe pastrimin e kanalit të shkarkimit vaditës, me një fond limit prej 39,450,216 lekë. Në këtë procedurë, 11 operatorë ekonomikë u skualifikuan pa asnjë bazë ligjore të qartë, duke i hapur rrugë kompanisë “Ergi SHPK” të shpallej fituese me një ofertë 24,367,806 lekë, shumë më e ulët se fondi limit. Ky veprim ngre dyshime të forta për manipulim të qëllimshëm të procedurës dhe favore të dhëna në mënyrë të paligjshme.
Ky nuk është rasti i vetëm. Në vitin 2018, Kontrolli i Lartë i Shtetit (KLSH) kallëzoi penalisht Arif Tafanin dhe gjashtë zyrtarë të tjerë të Bashkisë Belsh për shpërdorim detyre dhe shkelje të ligjit në fushën e prokurimit publik. Auditimi i KLSH-së zbuloi se, gjatë periudhës 2016–2017, u shkaktua një dëm ekonomik prej 80 milionë lekësh nga dhënia e tenderëve pa garë të vërtetë, skualifikimi i padrejtë i operatorëve dhe shpallja fituese e kompanive që nuk plotësonin kriteret e kërkuara. Ky veprim ka çuar në shpenzimin e fondeve publike pa efikasitet dhe pa transparencë, duke shkelur rëndë parimet e barazisë dhe konkurrencës së ndershme.
Po ashtu, në vitin 2024, Bashkia Belsh shpalli fituese të tenderit për furnizimin me karburant kompaninë “Vëllezërit Ferhati”, pa zhvilluar një procedurë të hapur dhe pa garë reale. Ky tender, me vlerë 80 milionë lekë, u dha në kushte që ngjallin dyshime të forta për korrupsion dhe abuzim me detyrën. Kjo praktikë ka përjashtuar mundësinë e konkurrencës së ndershme dhe ka favorizuar një kompani të caktuar, duke i shkaktuar dëm buxhetit të shtetit dhe duke minuar besimin e qytetarëve në institucionet publike.
Përballë këtyre abuzimeve të përsëritura dhe të dokumentuara, është e papranueshme që Arif Tafani të vazhdojë të qëndrojë në pozita të tilla udhëheqëse. Institucionet e drejtësisë, përfshirë SPAK-un dhe KLSH-në, duhet të ndërmarrin veprime të menjëhershme dhe të vendosura për të hetuar dhe ndëshkuar përgjegjësit e këtyre veprimeve të paligjshme dhe të dëmshme për interesin publik. Vetëm në këtë mënyrë mund të rikthehet besimi i qytetarëve në sistemin e prokurimeve publike dhe të sigurohet një administratë lokale që vepron në përputhje me ligjin dhe interesat e qytetarëve.
“Ergi Shpk” nuk është një kompani e panjohur për opinionin publik, pronari Nuri Ballën në vitin 2017 ka qenë nën hetim prej Prokurorisë së Elbasanit. Në atë kohë akuza nisi të ashtuquajturin megaoperacion hetimor për burimin e pasurisë së 67 personave, midis të cilëve gjendeshin edhe të afërm të ish- kryebashkiakut Qazim Sejdini.
Lista voluminoze përmbante edhe emra të biznesmenëve të ndryshëm dhe të njohur si të fuqishëm në Elbasan, ku ndër ta ishte edhe Nuri Balla.
Firma e Nuri Ballës është mjaft e njohur për tenderët që zhvillohen nga kryebashkiakët e Juglindjes. Kujtojmë se, më 19 qershor 2023, shoqëria “ECO-ELB” e bashkisë Elbasan, që ka në administrim landfillin dhe inceneratorin “Albtek Enery”, i ka dhënë firmës “ERGI Sh.p.k”, të drejtën e modifikimit, testimit dhe ndezjes së inceneratorit të Elbasanit, kundrejt vlerës 27.5 milionë lekë.
Ndërsa sipas dosjeve në e Prokurorinë Elbasan dhe në SPAK, e gjithë familja “Balla” janë nën hetim për evazion fiskal. Edhe njëherë tjetër shohim se si paratë e taksapaguesve përfundojnë në duart e afaristëve të integruar me pushtetin.
