Pas zgjedhjeve të 11 majit, në Ministrinë e Infrastrukturës dhe Energjetikës ka nisur një erë e re, por jo ajo e “reformave” apo “ringritjes institucionale”, por ajo e frikës dhe tronditjes. Paniku ka filluar të mbërthejë kampin e Belinda Ballukut, pasi struktura e ndërtuar prej vitesh rreth saj, që menaxhon miliarda lekë nga taksat e shqiptarëve, ka nisur të çakordohet nën goditjet e SPAK-ut. Dy nga figurat më të rëndësishme të këtij rrjeti, të njohur ndryshe si “Çunat e Belës”, tashmë janë goditur rëndë nga drejtësia. Pas marrjes së të pandehurit Gentian Gjyli, drejtori aktual i Autoritetit Rrugor Shqiptar (ARRSH) dy ditë më parë, një tjetër emër i rëndësishëm është futur në shënjestër: Erald Elezi, administratori i Korporatës Elektroenergjitike Shqiptare (KESH).
Prokuroria e Posaçme ka konfirmuar se Elezi është marrë i pandehur për “shpërdorim detyre” dhe “shkelje të barazisë në tendera”, të njëjtat akuza që rëndojnë mbi Gjylin. Mësohet se provat ndaj Elezit janë siguruar nga materialet e sekuestruara në telefonin e ish-drejtorit të ARRSH-së, Evis Berberi, i cili është gjithashtu nën hetim për këtë dosje, por ndodhet në burg që prej marsit 2024 pasi u arrestua me urdhër të SPAK me akuzën e korrupsionit dhe pastrimit të parave. SPAK ka nisur hetimin pasuror ndaj 25 të dyshuarve, 22 individë dhe 3 subjekte private. Ndër fondet dhe tenderat e abuzuar janë edhe ato të eficencës së energjisë elektrike, të subvencionuara nga BE. Hetimet janë në zhvillim dhe përfshijnë një tjetër fraksion që lidhet me zyrtarë të lartë. Në kohën e kryerjes së veprës penale, si Gjyli edhe Elezi ishin pjesë e Komisionit të Vlerësimit të Ofertave (KVO).
Ministria e Ballukut, “shtëpia” e abuzimeve sistematike
Pra institucionet ku janë identifikuar këto abuzime, ARRSH, KESH, Agjencia për Efiçencën e Energjisë janë të gjitha në varësi të drejtpërdrejtë të Belinda Ballukut. Ajo ka qenë jo vetëm figura politike që ka firmosur dhe mbrojtur këto struktura, por edhe personi që ka ndërtuar me kujdes dhe strategji një sistem të mbyllur ku tenderat, fondet dhe pozicionet drejtuese shpërndaheshin me logjikën e besnikërisë dhe përfitimit të ndërsjellë. Goditjet e njëpasnjëshme të SPAK-ut duken si sinjali i parë i shpërbërjes së një strukture që për shumë kohë ka funksionuar pa frikë nga ligji. Me dy drejtues të lartë tashmë të pandehur, perceptimi se Belinda Balluku është “e paprekshme” po venitet.
Burime të afërta me hetimin pohojnë se SPAK nuk ka ndërmend të ndalet. Hetimet janë në zgjerim, dhe struktura e ndërtuar prej vitesh rreth ministrisë së infrastrukturës po lëkundet çdo ditë. Ndërkohë që Balluku mundohet të ruajë imazhin e saj publik me deklarata për fitoren pas 11 majit, themelet e asaj që ka ngritur po çahen me forcën e ligjit. Nëse rrjeti që drejtonte miliarda në infrastrukturë dhe energji, me përfitues të përhershëm dhe kompani të lidhura politikisht, po rrëzohet një nga një, atëherë është vetëm çështje kohe që dora e drejtësisë të shtrihet më lart.
Me çdo drejtues të marrë i pandehur, gjithçka i afrohet më shumë zyrës së Belinda Ballukut. Dhe kjo nuk është më një çështje thashethemesh apo sulmesh politike është një hetim konkret, me prova, akuza dhe njerëz realë që janë përballë drejtësisë. Pas 11 majit, një tjetër faqe ka nisur të shkruhet në historinë e qeverisjes së Ballukut, jo si ministre e “transformimeve”, por si figurë qendrore në një skemë që tani po shpërbëhet nën hijen e SPAK-ut.
