Shqipëria ka zbritur tashmë në fushë në qytetin e Rigës, ku po përballet me Letoninë në ndeshjen e katërt të kualifikueseve për Kupën e Botës 2026. Kjo është një përballje vendimtare, pasi cilësohet si një nga ato takime ku gabimi nuk lejohet.
Kuqezinjtë janë të detyruar të marrin tri pikët për të ruajtur vendin e dytë në grup, menjëherë pas Anglisë dhe për të mbajtur larg ndjekësen më të afërt, Serbinë, që arriti një barazim në Tiranë disa ditë më parë.
Për të realizuar këtë objektiv, Shqipërisë i duhet të thyejë për herë të parë Letoninë, me të cilën pesë takimet e mëparshme janë mbyllur të gjitha në barazim.
Trajneri Silvinjo është detyruar të bëjë dy ndryshime në repartin defensiv për shkak të mungesës së Gjimshitit dhe Ajetit, duke u besuar vendet në formacion Ismajlit dhe Kumbullës.
Një tjetër ndryshim është bërë në krahun e djathtë të mbrojtjes, ku Balli zë vendin e Hysajt për arsye taktike. Pjesa tjetër e formacionit mbetet e pandryshuar nga ndeshja kundër Serbisë.
