West Ham United njoftoi vdekjen e legjendës së klubit, Billy Bonds MBE, në moshën 79-vjeçare. Lajmi u shpërnda në një deklaratë të familjes së tij, e cila shprehu dhimbjen për humbjen e babait të tyre, duke theksuar përkushtimin e Bonds ndaj familjes dhe dashurinë për West Ham-in dhe tifozët e tij. Familja e tij njoftoi se ai u nda “paqësisht”.
Klubi përshkroi Bonds si një “lojtar, trajner dhe menaxher legjendar”, duke e nderuar kujtimin me fjalët: “Pusho në paqe Billy, udhëheqësi ynë i guximshëm.” Edhe Charlton Athletic, klubi i tij i vetëm tjetër, shprehu ngushëllimet, e cilësuar humbjen si “tepër të dhimbshme”.
Billy Bonds ka një histori të lavdishme me West Ham, ku iu bashkua klubit në vitin 1967 nga Charlton. Ai ka regjistruar 799 paraqitje gjatë 21 viteve, më shumë se çdo lojtar tjetër në historinë e klubit. I njohur si një lojtar shumëanshëm, Bonds udhëhoqi West Ham-in drejt dy kupave FA dhe një titulli të Divizionit të Dytë. Pas përfundimit të karrierës si lojtar në moshën 41-vjeçare, ai u bë menaxher, duke çuar ekipin në një tjetër titull të Divizionit të Dytë dhe rikthimin në elitën e futbollit.
Pas njoftimit për vdekjen e tij, tifozët dhe figura të ndryshme të futbollit kanë lënë mesazhe ngushëllimi. Një tifoz e quajti Bonds “legjendë absolute”, ndërsa një tjetër e përshkroi si “Mr. West Ham”. Ish-sulmuesi Tony Cottee shprehu pikëllimin, duke e quajtur Bonds një hero dhe një njeri modest.
Billy Bonds lë pas vajzat e tij, Claire dhe Katie, si dhe mbesat Eloise dhe Elissa. Vdekja e tij është një humbje e madhe për klubin dhe tifozët, duke lënë një trashëgimi të rëndësishme në historinë e West Ham United.
