Gazetari Blendi Fevziu ka komentuar veprimet e SPAK në klimën elektorale, duke vënë theksin tek arrestimi i Erion Veliajt, kryebashkiakut të Tiranës.
Në një intervistë të dhënë për gazetarin Drini Zeqo, Blendi Fevziu e ka cilësuar këtë ngjarje si një moment vendimtar, i cili ka krijuar një tronditje të dukshme në kampin e majtë dhe ka forcuar opozitën. Më tej Fevziu thotë se vetëm Partia Demokratike ka një program për shqiptarët, ndërsa PS-ja nuk ka program dhe nuk e ka vëmendjen fare për të paraqitur një pragram për shqiptarët.
“Arrestimi i Veliajt dha një shok në anën e majtë, e rriti PD-në në nivelet më të larta të fushatës”-u shpreh Fevziu.
jemi pak ditë para zgjedhjeve, gazetari Blendi Fevziu nuk pret ndonjë surprizë të ngjashme nga drejtësia.
“Është vetëm kaq, vendime të tjera mund të merren pas zgjedhjeve. Nuk do ketë ndryshim të madh në këto dy javë e ca fushatë”-tha Fevziu.
Blendi Fevziu theksoi se fushata e këtij viti ka qenë ndjeshëm më e zbehtë dhe më pak intensive se më parë.
“S’ka asgjë! Asgjë! Ka një program të PD-së që ka ngritur disa gjëra, por s’ka asnjë përgjigje nga pala tjetër. Pala tjetër flet për një gjë që do ndodhë në 2030-ën. S’ka një vëmendje të madhe”, deklaroi ai.
Gazetari e cilësoi këtë fushatë elektorale si një fushatë “bosh”, pa shumë ide dhe propozime konkrete nga partitë politike.
“Dy fushatat më të mira që Shqipëria ka pasur, më e mira e gjithë historisë së Shqipërisë është fushata e vitit 2005. Ballafaqimi i drejtpërdrejtë i kandidatëve mazhoritarë me programet e partive, debatet më të mira të mundshme në studio televizive. E dyta është fushata e 2009-ës, ka qenë e jashtëzakonshme! Si në mundësi, entuziazëm e angazhim. Fushatat më të mira janë ato kur palët janë afër njëra-tjetrës. Kur fituesi nuk është i ditur pak a shumë, perceptimi publik është i ndarë. Janë fushatat më të vërteta”, tha Fevziu.
