AC Milan ka arritur një marrëveshje paraprake me sulmuesin gjerman Niclas Füllkrug për transferimin e tij në janar, në kuadër të përpjekjeve për të forcuar repartin sulmues. Drejtori sportiv Igli Tare po eksploron mundësi të tjera, por Füllkrug mbetet opsioni më i preferuar, duke u konsideruar një zgjidhje emergjente për ekipin. Max Allegri ka nevojë për një lojtar që mund të finalizojë dhe shënojë, pasi janari do të sjellë gjashtë ndeshje të rëndësishme.
Planifikohet që Füllkrug të transferohet në formë huazimi, me një mundësi blerjeje që ende nuk është përcaktuar. Milan do të mbuloj gjashtë muajt e fundit të pagës së tij prej rreth 1.5 milionë eurosh, që Füllkrug merr aktualisht nga West Ham, ku ka një kontratë deri në vitin 2028. Lojtari preferon Milanin dhe ka refuzuar oferta të tjera.
Füllkrug ka një histori të rëndësishme karriere, me 115 gola në 354 paraqitje. Ai ka spikatur në Werder Bremen, ku udhëhoqi ekipin për ngjitjen në Bundesligë me 19 gola në sezonin 2020/21. Në sezonin pasardhës, ai ishte golashënuesi më i mirë me 16 gola në 30 ndeshje. Performancat e tij i siguruan grumbullimin me përfaqësuesen e Gjermanisë, me të cilën ka shënuar 14 gola në 24 paraqitje.
Në verën e vitit 2023, Füllkrug u transferua te Borussia Dortmund, ku arriti 15 gola në ligë dhe Ligën e Kampionëve, çka rezultoi në një kalim në Angli për 30 milion euro. Megjithatë, ai ka hasur vështirësi te West Ham, duke shënuar vetëm 3 gola sezonin e kaluar dhe pa gola deri tani në sezonin aktual, pa filluar asnjë ndeshje të vetme që nga fillimi i tetorit.
