Federata Shqiptare e Futbollit (FSHF) njofton tifozët se ka filluar procesi i aplikimit për biletat e ndeshjes Poloni–Shqipëri, e cila do të zhvillohet më 26 mars në Varshavë, në kuadër të fazës play-off të Kampionatit Botëror 2026. Të interesuarit mund të aplikojnë përmes një linku të dedikuar, duke ndjekur procedurat e ngjashme me ato të blerjeve të mëparshme.
FSHF ka përgatitur udhëzime të qarta për aplikimin. Tifozët e interesuar duhet të regjistrohen në platformë, duke krijuar një llogari personale ose duke përdorur një llogari ekzistuese. Secili aplikant mund të kërkojë vetëm dy bileta, pa mundësi për të aplikuar për më shumë ose më pak.
Procesi i aplikimit do të jetë i hapur për një periudhë 48 orësh. Pas kësaj kohe, sistemi do të përzgjedhë rastësisht aplikantët fitues. Aplikantët që do të zgjidhen do të njoftohen përmes email-it dhe do të marrin një link të personalizuar për të përfunduar pagesën. Pagesa duhet të kryhet brenda 24 orëve nga njoftimi.
Pasi të përfundojë pagesa, fituesit do të kenë qasje në biletat e tyre përmes një linku të veçantë. Biletat do të jenë të disponueshme për shkarkim në aplikacionin zyrtar “Mobilny System Biletowy”. FSHF apelon për kujdes ndaj afateve dhe procedurave, për të garantuar një proces të suksesshëm dhe të rregullt për tifozët që dëshirojnë të ndjekin këtë ndeshje të rëndësishme.
