Agi Kons, një nga kompanitë më të mëdha të ndërtimit në Shqipëri, tashmë është me pronësi të huaj. Biznesmeni Gentjan Sula ka vendosur të transferojë në Angli pronësinë e kompanisë, e cila ka ndërtuar Kodrën e Diellit si dhe një sërë projektesh të tjera madhore në Tiranë dhe bregdet.
Dokumentat zyrtare tregojnë se transferimi i pronësisë është bërë në dhjetor të vitit të kaluar, përmes një kontrate shkëmbimi aksionesh, ku aksionet e Agi Kons i kanë kaluar një kompanie të quajtur UK Development Holding Limited. Kjo e fundit është një shoqëri e regjistruar në Londër në gusht të vitit të kaluar dhe zotërohet në masën 100 për qind po nga Gentjan Sula.
Transferimi i pronesise se Agi Kons ne Angli
Përmes kësaj lëvizje, Gent Sula mbetet pronari fundor i Agi Kons, por tashmë aksionet e saj i kontrollon nga Anglia.
Në kontratën e shkëmbimit të kuotave, biznesmeni e motivon riorganizimin e kompanive në pronësi të tij si një lëvizje për të optimizuar operacionet, por edhe për të eksploruar mundësinë e zgjerimit në tregun britanik.
Por kjo lëvizje vjen në një kohë kur kompania ishte vënë nën hetim nga SPAK për dosjen Veliaj. Vetë biznesmeni Sula tashmë është nën masë shtrënguese nga gjykata me “detyrim paraqitje. Tre javë më parë, atij iu komunikua akuza e korrupsionit aktiv.
Sipas SPAK, zoti Sula ka patur lidhje të ngushta me Erion Veliajn, që nga momenti kur kryebashkiaku mbulonte detyrën e Ministrit të Punës dhe Çështjeve Sociale. Kjo marrëdhënie sipas SPAK ka qenë e pandarë edhe e vazhdueshme.
Prokuroria e Posaçme pretendon se me zgjedhjen e Veliaj në krye të Bashkisë së Tiranës, ‘Agi Kons’ me pronar Gentian Sulën fillon dhe fiton leje të pafundme ndërtimi, por edhe tendera publikë, të cilat sipas SPAK, i janë kthyer në shpërblim Veliajt në formën e pasurive të patundshme.
Nuk dihet nëse transferimi i pronësisë së Agi Kons në Angli lidhet me hetimet e SPAK. Teorikisht pronësia e huaj do t’i jepte mundësinë biznesmenit që në rast të sekuestrimit të kompanisë nga organet e drejtësisë shqiptare të kishte mundësinë e arbitrazhit në gjykatat ndërkombëtare.
Agi Kons është një nga kompanitë më të mëdha të ndërtimit në Shqipëri. Aktualisht kompania ka një kapital prej 1.5 miliardë lekësh ose 12.6 milionë paundësh, i cili ka kaluar i gjithi nën pronësinë e anglezes UK Development Holding Limited. /kapitali
